(រាជធានីភ្នំពេញ)៖ នាព្រឹកថ្ងៃសុក្រ ៦កើត ខែភទ្របទ ឆ្នាំម្សាញ់ សប្តស័ក ពស២៥៦៩ ត្រូវនឹងថ្ងៃទី២៩ ខែសីហា ឆ្នាំ២០២៥ នៅទីស្តីការគណៈរដ្ឋមន្រ្តី មានរៀបចំពិធីប្រគល់-ទទួលអំណោយសម្ភារៈអភិរក្សបណ្ណសារ រវាងស្ថានទូតបារាំង និងទីស្តីការគណៈរដ្ឋមន្រ្តី។ ពិធីនេះ បានប្រព្រឹត្តិទៅក្រោមអធិបតីភាពឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាបណ្ណសារ និងឯកឧត្តម Olivier RICHARD ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំព្រះរាជាណាចក្រកម្ពុជា ដោយមានការអញ្ជើញចូលរួមពីឯកឧត្តមទេសរដ្ឋមន្រ្តី អ៊ុក រ៉ាប៊ុន, ឯកឧត្ដមទេសរដ្ឋមន្រ្តី ថោង ខុន, និងឯកឧត្តមទេសរដ្ឋមន្រ្តី ឆែម គាតរិទ្ធី ព្រមទាំងឯកឧត្ដម លោកជំទាវ លោក លោកស្រី ជាថ្នាក់ដឹកនាំ និងមន្រ្តីរាជការនៃទីស្ដីការគណៈរដ្ឋមន្រ្តី។ សម្ភារៈអភិរក្សបណ្ណសារនេះ រួមមានប្រអប់ និងសឺមីដាក់ឯកសារចំនួន១0ដុំ មានទម្ងន់សរុប១,៣៨១គីឡូក្រាម ដែលជាអំណោយរបស់ក្រុមហ៊ុន Société Cauchard តាមរយៈស្ថានទូតបារាំងប្រចាំកម្ពុជា។
ក្នុងនាមរាជរដ្ឋាភិបាលកម្ពុជា និងក្រុមប្រឹក្សាបណ្ណសារ, ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានសម្តែងការនូវការអបអរសាទរ និងស្វាគមន៍យ៉ាងកក់ក្តៅចំពោះឯកឧត្ដម Olivier RICHARD ដែលទើបទទួលបានការតែងតាំងជាឯកអគ្គរដ្ឋទូតបារាំងថ្មីប្រចាំកម្ពុជា និងជូនពរឱ្យសម្រេចបានជោគជ័យក្នុងអាណត្តិការងារនៅកម្ពុជា ដើម្បីពង្រឹងនិងពង្រីកបន្ថែមទៀតនូវចំណងមិត្តភាពដ៏រឹងមាំរវាងកម្ពុជា-បារាំង ក៏ដូចជាដើម្បីបន្តរក្សាឲ្យបាននូវគុណតម្លៃរួមរបស់ប្រទេសទាំងពីរ។ ឯកឧត្តម វង្សី វិស្សុត ក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលបារាំង តាមរយៈស្ថានទូតបារាំងប្រចាំកម្ពុជា និងក្រុមហ៊ុន Société Cauchard ចំពោះអំណោយសម្ភារៈដ៏មានតម្លៃនេះ ដែលបង្ហាញឱ្យឃើញអំពីកិច្ចសហប្រតិបត្តិការល្អរវាងសាធារណរដ្ឋបារាំង និងព្រះរាជាណាចក្រកម្ពុជា និងការយកចិត្តទុកដាក់របស់បារាំងចំពោះវិស័យបណ្ណសាររបស់កម្ពុជា។
ឯកឧត្តមឧបនាយករដ្ឋមន្ត្រីប្រចាំការ បានបន្តថា ទំនាក់ទំនងកម្ពុជា-បារាំង ត្រូវបានបង្កើតឡើងជាច្រើនសតវត្សរ៍មកហើយ និងត្រូវបានផ្សារភ្ជាប់ជាប្រវត្តិសាស្រ្តរួមមួយ និងតាមរយៈការគោរពគ្នាទៅវិញទៅមក ហើយឥទ្ធិពលនៃទំនាក់ទំនងរវាងប្រទេសទាំងពីរត្រូវបានឆ្លុះបញ្ចាំងឱ្យឃើញនៅក្នុងប្រព័ន្ធរដ្ឋបាល ប្រព័ន្ធច្បាប់ ប្រព័ន្ធអប់រំ វប្បធម៌ និងក្នុងទិដ្ឋភាពជាច្រើនទៀត ដូចដែលមានបង្ហាញក្នុងបណ្ណសារជាតិកម្ពុជាដែលត្រូវបានសម្ពោធនៅឆ្នាំ១៩២៦ និងមានបណ្តុំបណ្ណសារចាប់ពីសម័យអាណានិគម ចន្លោះឆ្នាំ១៨៦៣ ដល់ឆ្នាំ១៩៥៣ និងបន្តរហូតមកដល់បច្ចុប្បន្ន។ ឯកឧត្តមបានបន្តថា ទំនាក់ទំនងកម្ពុជា-បារាំង ត្រូវបានធ្វើឱ្យកាន់តែប្រសើរឡើង ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា និងឯកឧត្តមប្រធានាធិបតី អេម៉ានុយអ៊ែល ម៉ាក្រុង និងបច្ចុប្បន្នក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តមប្រធានាធិបតី អេម៉ានុយអ៊ែល ម៉ាក្រុង ។
ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត បានគូសបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានផ្តល់សារៈសំខាន់ទៅលើការអភិរក្ស និងការធ្វើទំនើបកម្មបណ្ណសារជាតិ ដែលជាការរក្សាទុកនូវចំណេះដឹង និងភស្តុតាងប្រវត្តិសាស្ត្រមិនអាចកាត់ថ្លៃបាន ក្នុងការកំណត់អត្តសញ្ញាណ និងការការពារអធិបតេយ្យភាពជាតិ ជាមូលដ្ឋានគ្រឹះនៃការកសាងជាតិ។
ក្នុងឱកាសនោះដែរ ដោយមើលឃើញអំពីគុណតម្លៃនៃកិច្ចខិតខំប្រឹងប្រែងផ្នែកបណ្ណសារ និងតួអង្គដ៏សំខាន់របស់ប្រទេសបារាំងក្នុងប្រវត្តិសាស្ត្រកម្ពុជា ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានស្នើឱ្យស្ថានទូតបារាំង បន្តសហការជិតស្និទ្ធជាមួយទីស្តីការគណៈរដ្ឋមន្ត្រី ដើម្បីរិះរកមធ្យោបាយបន្ថែមទៀត ក្នុងការធ្វើទំនើបកម្ម និងការពង្រឹងបណ្ណសារ ដែលជាផ្នែកមួយមិនអាចខ្វះបាននៃបេតិកភណ្ឌរួម ព្រមទាំងបានថ្លែងអំណរគុណចំពោះឯកឧត្តម Olivier RICHARD ឯកអគ្គរដ្ឋទូតបារាំងប្រចាំកម្ពុជា និងមន្ត្រីស្ថានទូត ចំពោះកិច្ចខិតខំប្រឹងប្រែងក្នុងការពង្រឹង និងពង្រីក យ៉ាងស៊ីជម្រៅលើកិច្ចសហប្រតិបត្តិការនេះ។
