ទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងកម្ពុជារួមគ្នាជំរុញកំណែទម្រង់អភិបាលកិច្ចតាមរយៈគម្រោងកសាងសមត្ថភាព សាលាភូមិន្ទរដ្ឋបាល (RSA)
នៅរសៀលថ្ងៃទី៣ ខែកុម្ភៈ ឆ្នាំ២០២៦ ទីភ្នាក់ងារសហប្រតិ បត្តិការអន្តរជាតិកូរ៉េ (KOICA) សហការយ៉ាងជិតស្និទ្ធជាមួយក្រសួងមុខងារសាធារណៈ (MCS) បានរៀបចំកិច្ចប្រជុំបូកសរុបលទ្ធផលការងារ នៅសាលាភូមិន្ទរដ្ឋបាល (RSA) ដើម្បីអបអរសាទរការបញ្ចប់ដោយជោគជ័យនៃការបញ្ជូនសេវាកម្មប្រឹក្សាយោបល់គ្រប់គ្រងគម្រោង (PMC) លើកទី 1 ក្រោមគម្រោងពង្រឹងសមត្ថភាពសាលាភូមិន្ទរដ្ឋបាល សម្រាប់កំណែទម្រង់អភិបាលកិច្ច និងពង្រឹងសមត្ថភាពកម្ពុជា (2025–2029)។
កិច្ចប្រជុំនេះដែរ ដឹកនាំដោយ ឯកឧត្តម យក់ ប៊ុនណារដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល (RSA) និងលោកស្រី លី សេជីន អនុប្រធានការិយាល័យ KOICA ប្រចាំកម្ពុជា បានគូសបញ្ជាក់ពីកិច្ចសហប្រតិបត្តិការជាបន្តបន្ទាប់រវាង KOICA និងរដ្ឋាភិបាលកម្ពុជាក្នុងការជំរុញកំណែទម្រង់រដ្ឋបាលសាធារណៈ។
ក្នុងអំឡុងពេលនៃវគ្គនេះ ក្រុម PMC ដឹកនាំដោយសាស្ត្រាចារ្យ លី ជុងយ៉េល បានបង្ហាញពីការរកឃើញសំខាន់ៗពីការស្ទង់មតិចាប់ផ្តើម និងចែករំលែកលទ្ធផលនៃសិក្ខាសាលាស្តីពីផែនការមេ កម្មវិធីសិក្សា ICT និងប្រព័ន្ធឌីជីថល (វេទិកាសិក្សាតាមអ៊ីនធឺណិត)។ ការពិភាក្សាទាំងនេះបានផ្តល់មូលដ្ឋានគ្រឹះដ៏រឹងមាំសម្រាប់ការកែលម្អការជ្រើសរើសមន្ត្រីរាជការ ប្រព័ន្ធបណ្តុះបណ្តាល និងសមត្ថភាពស្ថាប័ននៅ RSA។
គម្រោងនេះផ្តោតការយកចិត្តទុកដាក់យ៉ាងខ្លាំងទៅលើការ អប់រំផ្អែកលើ ICT និងវេទិកាសិក្សាឌីជីថល ដែលអនុញ្ញាតឱ្យមន្ត្រីរាជការទទួលបានការបណ្តុះបណ្តាលទាំងតាមអ៊ីនធឺណិត និងក្រៅបណ្តាញ។ គំនិតផ្តួចផ្តើមនេះគាំទ្រដោយផ្ទាល់ចំពោះអាទិភាពរបស់ប្រទេសកម្ពុជាលើការផ្លាស់ប្តូរឌីជីថលក្នុងរដ្ឋបាលសាធារណៈ ដោយមានគោលបំណងកសាងសេវាស៊ីវិលដែលមានប្រសិទ្ធភាព ទំនើប និងជំរុញដោយបច្ចេកវិទ្យា។
កិច្ចប្រជុំបានបញ្ចប់ដោយការពិភាក្សាប្រកបដោយផលិតភាព ការចុះហត្ថលេខាលើកំណត់ហេតុនៃកិច្ចប្រជុំ (MoM) រវាង ក្រសួងមុខងារសាធារណៈ (MCS) និង ទីភ្នាក់ងារសហប្រតិ បត្តិការអន្តរជាតិកូរ៉េ (KOICA) ដែលបញ្ជាក់ជាថ្មីនូវការប្តេជ្ញាចិត្តរួមគ្នាចំពោះការអនុវត្តគម្រោងដោយជោគជ័យក្នុងរយៈ ពេលបួនឆ្នាំខាងមុខ ជាមួយនឹងថវិកាសរុបចំនួន 11.7 លានដុល្លារអាមេរិក។
ព្រឹត្តិការណ៍សំខាន់នេះឆ្លុះបញ្ចាំងពីភាពជាដៃគូរយៈពេលវែងរបស់ KOICA ជាមួយប្រទេសកម្ពុជា ក្នុងការលើកកម្ពស់អភិបាលកិច្ចល្អ ការពង្រឹងស្ថាប័ន និងការអភិវឌ្ឍធនធាន មនុស្សសម្រាប់កំណើនជាតិប្រកបដោយចីរភាព៕
