ក្រុមការងារជំរុញការវិនិយោគក្នុងខេត្តព្រះសីហនុ ដែលបានបង្ហាញពីលទ្ធផលនៃការអនុវត្តការងារជំរុញការវិនិយោគក្នុងខេត្តព្រះសីហនុ បានអោយដឹងថា ៖ ចាប់ពីឆ្នាំ ២០២៤ រហូតដល់ខែ សីហា ឆ្នាំ ២០២៥ ក្រុមការងារជំរុញគម្រោងវិនិយោគក្នុងខេត្តព្រះសីហនុបានសម្រេចជាគោលការណ៍ផ្តល់ការលើកទឹកចិត្ត ដល់គម្រោងវិនិយោគចំនួន ៣៧៥ គម្រោង ដែលគិតជាទុនវិនិយោគមានប្រមាណសរុប ៧ ៨៩១ លានដុល្លារអាមេរិក។
គម្រោងដែលផ្តល់ការលើកទឹកចិត្តជាង ៣០០ គម្រោង ក្នុងនោះពាក់ព័ន្ធគម្រោងអគារជាប់គាំងមានចំនួន ១៧៦ គម្រោង, គម្រោងវិនិយោគថ្មីមានចំនួន ១៦១ គម្រោង គម្រោងពង្រីកមានចំនួន ២៥ គម្រោង និងគម្រោងវិនិយោគមានស្រាប់ មានចំនួន ១៣ គម្រោង។
តាមរយៈគម្រោងវិនិយោគទាំងនោះ បើតាមការប៉ាន់ស្មានអាចបង្កើតការងារបានចំនួន ៥៦ ៧០០ កន្លែង។ នេះបើតាមក្រុមការងារជំរុញការវិនិយោគក្នុងខេត្តព្រះសីហនុ។
ឯកឧត្តម ហ៊ាន សាហ៊ីប ប្រធានក្រុមការងារជំរុញការវិនិយោគក្នុងខេត្តព្រះសីហនុបានថ្លែងថា ដើម្បីទទួលបាន «អត្ថប្រយោជន៍ពិសេស» លោកបន្តលើកទឹកចិត្តដល់ធុរជននិងវិនិយោគិន អាចមកដាក់ពាក្យឬស្នើមកកាន់ក្រុមការងារជំរុញការវិនិយោគក្នុងខេត្តព្រះសីហនុ ដើម្បីទទួលបានការលើកទឹកចិត្តពិសេសទាំងផ្នែកពន្ធ ការសម្របសម្រួលផ្នែករដ្ឋបាល និងការសម្រួលនីតិវិធីផ្សេងៗពាក់ព័ន្ធនឹងការវិនិយោគ៕
