ចិនទម្លាយគម្រោងវារីអគ្គិសនីធំបំផុតរបស់ខ្លួនសម្រាប់ពិភពលោកពីតំបន់ទីបេ ខណៈឥណ្ឌាតែងតែសម្តែងក្តីព្រួយបារម្ភជារឿយៗ ជុំវិញការអភិវឌ្ឍមួយនេះដែរ! 

ទូរទស្សន៍រដ្ឋ CCTV បានរាយការណ៍ថា នាយករដ្ឋមន្ត្រីចិនលោក Li Qiang បានអញ្ជើញចូលរួមក្នុងពិធីបើកការដ្ឋានសម្រាប់ការងារចាប់ផ្តើមគម្រោងវារីអគ្គីសនីដ៏ធំនៅតំបន់ទីបេកាលពីចុងសប្តាហ៍នេះ។ គម្រោងដ៏ចម្រូងចម្រាសដែលស្ថិតនៅផ្នែកខាងក្រោមនៃទន្លេ Yarlung Zangbo ត្រូវបានគេរំពឹងថានឹងក្លាយជារោងចក្រវារីអគ្គីសនីដ៏ធំបំផុតរបស់ពិភពលោកផងដែរ។ ប៉ុន្តែវាក៏បានបង្កើននូវក្តីព្រួយបារម្ភជុំវិញការផ្លាស់ទីលំនៅរបស់សហគមន៍នានានៅតំបន់ទីបេ ក៏ដូចជាផលប៉ះពាល់បរិស្ថាននៅខាងក្រោមដែនទឹកក្នុងប្រទេសឥណ្ឌា និងបង់ក្លាដែសដែរ។ CCTV បាននិយាយថា គម្រោងនៅទីក្រុង Nyingchi ដែលជាទីក្រុងភាគអាគ្នេយ៍ក្នុងតំបន់ស្វយ័តទីបេ នឹងរួមបញ្ចូលស្ថានីយ៍វារីអគ្គិសនីចំនួន៥ដោយមានការវិនិយោគជាទឹកប្រាក់សរុបប្រហែលជា ១.២ ទ្រីលានយន់ ស្មើនឹង ១៦៧.៨ ប៊ីលានដុល្លារអាម៉េរិក។ CCTV បានរាយការណ៍ថាវាជាផ្នែកមួយនៃកិច្ចខិតខំប្រឹងប្រែងរបស់ប្រទេសចិនក្នុងការកាត់បន្ថយការបំភាយកាបូន និងដោះស្រាយការប្រែប្រួលអាកាសធាតុជាសកល ហើយនឹងចែកចាយអគ្គិសនីដើម្បីបំពេញតម្រូវការទាំងនៅក្នុងតំបន់ទីបេ និងក្នុងតំបន់ផ្សេងៗទៀត។ សម្រាប់បញ្ហានេះដែរ ឥណ្ឌាក៏បានសម្តែងនូវក្តីព្រួយបារម្ភរបស់ខ្លួនម្តងហើយម្តងទៀតអំពីគម្រោងនេះ ហើយបានជំរុញឱ្យទីក្រុងប៉េកាំងធានាផលប្រយោជន៍នៃរដ្ឋដែលស្ថិតនៅផ្នែកខាងក្រោមនៃព្រហ្មញ្ញសាសនា នឹងមិនមានគ្រោះថ្នាក់អ្វីឡើយជាពិសេសដងទន្លេ Yarlung Tsangpo ដែលមានដើមកំណើតនៅតំបន់ភ្នំហិម៉ាឡៃទីបេ ហើយចូលទៅក្នុងប្រទេសឥណ្ឌាដូចជាទន្លេ Siang នៅរដ្ឋ Arunachal Pradesh ភាគខាងកើតដ៏ឆ្ងាយមែន ប៉ុន្តែ វានឹងហូរចុះចាក់ទៅកាន់រដ្ឋ Assam និង Brahmaputra ផងដែរ ហើយទីបំផុតទន្លេនេះហូរចូលទៅក្នុងឈូងសមុទ្រ Bengal ដោយឆ្លងកាត់ប្រទេសបង់ក្លាដែស ដែលគេបានហៅឈ្មោះវាថា Padma នោះ៕ 

សម្រួលអត្ថបទ៖ សុផារិន្ទ