គណៈប្រតិភូខេត្តមណ្ឌលគិរី អញ្ជើញចុះសួរសុខទុក្ខវីរកងទ័ព ដែលកំពុងសម្រាក និងព្យាបាលជំងឺនៅមន្ទីរពេទ្យបង្អែកខេត្តព្រះវិហារ សៀមរាប និងវីរកងទ័ពនៅជួរមុខ

ខេត្តមណ្ឌលគិរី ៖ ក្នុងដំណើរចុះសាកសួរសុខទុក្ខ វីរៈកងទ័ពជួរមុខរយៈពេលពីរថ្ងៃ គណៈប្រតិភូខេត្តមណ្ឌលគិរី ដឹកនាំដោយឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី ឯកឧត្តម ថង សាវុន អភិបាលខេត្ត និងលោកជំទាវ រួមទាំងមន្រ្តីក្រោមឱវាទ បានធ្វើដំណើរប្រមាណជាង មួយពាន់គីឡូម៉ែត្រ ដើម្បីផ្តល់កម្លាំងចិត្ត និងនាំយកជំនួយឧបត្ថម្ភ ជូនដល់វីរកងទ័ព ដែលកំពុងសម្រាកព្យាបាលនៅមន្ទីរពេទ្យបង្អែកខេត្តព្រះវិហារ និងខេត្តសៀមរាប នាថ្ងៃទី៣០-៣១ ខែសីហា ឆ្នាំ២០២៥។

ឯកឧត្តម ថង សាវុន អភិបាលខេត្តមណ្ឌលគិរី បាននាំនូវការផ្ដាំផ្ញើរសាកសួរសុខទុក្ខ និងសេចក្តីនឹករឮកពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងយកចិត្តទុកដាក់ និងព្រួយបារម្ភពីសុខសុវត្ថិភាព របស់បងប្អូនកងទ័ពរបស់យើង។ ឯកឧត្តម បានលើកឡើងថា ផលវិបាកនៃសង្គ្រាមបានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្តាច់ជីវិតមនុស្ស មិនរើសមុខ ទាំងទាហាន និងជនស៊ីវិលស្លូតត្រង់។ ប្រជាពលរដ្ឋត្រូវបង្ខំចិត្តភៀសខ្លួន ចាកចេញពីផ្ទះសម្បែងទ្រព្យសម្បត្តិសត្វចិញ្ចឹម ដែលមិនអាចយកមកជាមួយបាន ហើយត្រូវប្រឈមនឹងការខ្វះទីជម្រក ខ្វះអាហារហូបចុក ខ្វះទឹកស្អាតប្រើប្រាស់ បាត់បង់មុខរបរ បាត់បង់ចំណូល ជួបការលំបាកក្នុងជីវភាព ក្មេងៗអាក់ខានការសិក្សា ព្រមទាំងប្រឈមនឹងការលំបាកជាច្រើនផ្សេងទៀត។ ទុក្ខលំបាកទាំងនេះ គឺកាន់តែធ្វើឱ្យយើងទាំងអស់គ្នាយល់យ៉ាងច្បាស់ពីគុណតម្លៃនៃសុខសន្តិភាព។ ដូច្នេះ សន្តិភាព គឺពិតជាមានតម្លៃណាស់ ដែលភាគីទាំងអស់ ត្រូវចូលរួមថែរក្សា និងការពារឱ្យខាងតែបាន។ ហើយការលះបង់របស់បងប្អូនកងទ័ព គឺពិតជាមានតម្លៃមិនអាចកាត់ថ្លៃបានឡើយ ចំពោះជាតិមាតុភូមិរបស់យើង និងសូមបន់ស្រន់ឲ្យទេវតាតាមជួយថែរក្សាការពារបងប្អូនជនភៀសសឹក និងបងប្អូនវីរកងទ័ពទាំង អស់ មានសុខភាពល្អ យកជ័យជម្នះឈ្នះអស់មាសត្រូវ គ្រប់ពេលវេលា។

ក្នុងឱកាសចុះសំណេះសំណាលសាកសួរសុខទុក្ខ វីរកងទ័ពជួរមុខដែលកំពុងព្យាបាលជំងឺ គណៈប្រតិភូខេត្តមណ្ឌលគិរី បានផ្តល់ជូនគ្រឿងឧបភោគបរិភោគ សម្ភារប្រើប្រាស់ និងថវិកាចំនួន ៦៦លានរៀល ឧបត្ថម្ភដល់កងពលធំលេខ៣ និងវីរកងទ័ពនៃយោធភូមិភាគ១ នៅស្រុកជាំក្សាន្ត (តំបន់មុំបី) ខេត្តព្រះវិហារ។ ចំណែកវីរកងទ័ព ដែលកំពុងសម្រាកព្យាបាលនៅមន្ទីរពេទ្យបង្អែកខេត្តព្រះវិហារ និងខេត្តសៀមរាបចំនួន ៦៣នាក់ ក្នុងម្នាក់ៗ ទទួលបានថវិកាចំនួន ៤០ម៉ឺនរៀល និងឃីតមួយកញ្ចប់ ដើម្បីជាការលើកទឹកចិត្ត និងសូមជូនពរវីរកងទ័ពទាំងអស់ ឆាប់ជាសះស្បើយ៕ ស៉ីផុន ហ៊ុងគ្រី