ខេមបូណូមីស សហការជាមួយក្រុមហ៊ុន វើលដ៏ប្រ៊ីដ គ្រុប រៀបចំវេទិកាពិភាក្សាដ៏ធំប្រចាំឆ្នាំ ស្ដីពី «មាគ៌ាប្រតិបត្តិពាណិជ្ជកម្ម និងការវិនិយោគឆ្នាំ២០២៥»
អង្គភាពសារព័ត៌មាន ឌីជីថល ខេមបូណូមីស ដែលជាស្ថាប័នព័ត៌មានសេដ្ឋកិច្ចឈានមុខគេនៅកម្ពុជា សហការជាមួយក្រុមហ៊ុន វើលដ៏ប្រ៊ីដ គ្រុប បានរៀបចំវេទិកាពិភាក្សាដ៏ធំប្រចាំឆ្នាំ ស្ដីពី «មាគ៌ាប្រតិបត្តិពាណិជ្ជកម្ម និង ការវិនិយោគ ២០២៥» នៅរាជធានីភ្នំពេញ ដោយវេទិកានេះប្រមូលផ្ដុំទៅដោយមេដឹកនាំធុរកិច្ចធំៗ និងអ្នកជំនាញសេដ្ឋកិច្ចល្បីៗ រួមទាំងថ្នាក់ដឹកនាំអាជីវកម្ម និងសហគ្រិនជាច្រើនរូប។
តាមលោក ស៊ឺន សាយ ស្ថាបនិក និងជាអគ្គនាយកអង្គភាពសារព័ត៌មាន ខេមបូណូមីស បានអោយដឹងថា វេទិកាដ៏មានសារៈសំខាន់នេះ ត្រូវបានរៀបចំឡើង ក្នុងគោលបំណងជំរុញឱ្យមានកិច្ចសន្ទនាជាយុទ្ធសាស្ត្រអភិវឌ្ឍ ការបង្កើតឱកាសសំខាន់ៗ និង កិច្ចសហប្រតិបត្តិការ សម្រាប់ការធ្វើពាណិជ្ជកម្ម និងការវិនិយោគ ក៏ដូចជា ផ្ដល់ជាធាតុចូល សម្រាប់ការរៀបចំនូវគោលនយោបាយសេដ្ឋកិច្ចជាតិសំខាន់ៗ។ លោក ស៊ឺន សាយ ក៏បានថ្លែងអំណរគុណចំពោះ ក្រុមហ៊ុន វើលដ៏ប្រ៊ីដ គ្រុប ដែលបានសហការគាំទ្រ យ៉ាងពេញទំហឹង សម្រាប់គំនិតផ្ដួចផ្ដើមរៀបចំវេទិកាពិភាក្សានេះ ដែលបានបង្ហាញពីការយកចិត្តទុកដាក់ខ្ពស់ ក្នុងការចូលរួមអភិវឌ្ឍវិស័យឯកជន បន្ដជំរុញ លើកកម្ពស់បរិយាកាសធុរកិច្ចកម្ពុជាកាន់តែប្រសើរ និងមានភាពប្រកួតប្រជែងខ្ពស់។
អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន វើលដ៏ប្រ៊ីដ គ្រុប បានបញ្ជាក់ថា ក្រុមហ៊ុន វើលដ៏ប្រ៊ីដ គ្រុប គឺជាក្រុមហ៊ុនឈានមុខគេនៅកម្ពុជា ដែលមានផលប័ត្រចម្រុះ រួមមានផ្នែកដឹកជញ្ជូន អចលនទ្រព្យ និងសេវាកម្មហិរញ្ញវត្ថុ ជាដើម។នៅក្នុងការប្តេជ្ញាចិត្តជំរុញកំណើនសេដ្ឋកិច្ច និងការច្នៃប្រឌិត, ក្រុមហ៊ុនបានចាប់ដៃគូជាមួយអ្នកពាក់ព័ន្ធតាមបណ្តាប្រទេសនានានិងក្នុងតំបន់ ដើម្បីផ្តល់នូវដំណោះស្រាយប្រកបដោយប្រសិទ្ធភាពលើគ្រប់ឧស្សាហកម្ម។ដោយឡែកការចូលរួមនៅក្នុងវេទិកានេះ បានឆ្លុះបញ្ចាំងពីការប្តេជ្ញាចិត្តរួមគ្នា ក្នុងការជំរុញការសន្ទនា បង្កើនកិច្ចសហប្រតិបត្តិការ និងការបើកឱកាស ដែលនឹងជំរុញដល់ការផ្លាស់ប្ដូរសេដ្ឋកិច្ចរបស់ប្រទេសកម្ពុជានាពេលខាងមុខ។អ្នកឧកញ៉ាសៀ ឬទ្ធី បានបន្ថែមថា វេទិកានេះ ក៏បានដើរតួនាទីសំខាន់ក្នុងការប្រមូលផ្ដុំអ្នកជំនាញពីវិស័យរដ្ឋ និងឯកជន ដើម្បីចូលរួមពិភាក្សាផ្ដល់នូវទស្សនទានល្អ សម្រាប់ការដោះស្រាយបញ្ហាសេដ្ឋកិច្ចសំខាន់ៗ ដែលពិភពលោក រួមទាំងកម្ពុជាកំពុងជួបប្រទះផងដែរ។
ក្នុងឱកាសនោះ ឯកឧត្តមសាស្ត្រាចារ្យបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រី ទទួលបន្ទុកបេសកកម្មពិសេស ដែលបានអញ្ជើញចូលរួមជាវាគ្មិន និងសម្របសម្រួលនៅក្នុងវេទិកានេះ បានលើកឡើងថា កិច្ចពិភាក្សាពេញមួយថ្ងៃនេះគ្របដណ្ដប់លើប្រធានបទសំខាន់ៗចំនួន៦ដែលមានទំនាក់ទំនងគ្នាយ៉ាងស៊ីជម្រៅ ហើយប្រធានបទទាំងនេះ ក៏ជាសរសរស្ដម្ភ ដែលអាចនឹងបង្កើតបានជាក្របខណ្ឌមួយសម្រាប់ភាពធន់នៃសេដ្ឋកិច្ចរបស់ប្រទេសកម្ពុជាផងដែរ។ ឯកឧត្តមសាស្ត្រាចារ្យបណ្ឌិតសភាចារ្យ បានបន្ថែមថា ការអនុវត្តគំនិតផ្តួចផ្តើមទាំងនេះ ពិតជាតម្រូវឱ្យមានកិច្ចខិតខំប្រឹងប្រែងសម្របសម្រួល មិនត្រឹមតែពីវិស័យឯកជនប៉ុណ្ណោះទេ ប៉ុន្តែក៏មានតម្រូវការការគាំទ្រយ៉ាងខ្លាំងពីក្រសួង ស្ថាប័នពាក់ព័ន្ធរបស់រាជរដ្ឋាភិបាល អ្នកផ្តល់ជំនួយ និងភាគីពាក់ព័ន្ធទាំងអស់។
សូមបញ្ជាក់ថា វេទិកាកិច្ចពិភាក្សា ស្ដីអំពី «មាគ៌ាប្រតិបត្តិពាណិជ្ជកម្ម និងការវិនិយោគឆ្នាំ២០២៥» ត្រូវបានរៀបចំឡើងរយៈពេលពេញមួយថ្ងៃ ដោយមានការធ្វើបទបង្ហាញពីវាគ្មិនពាក់ព័ន្ធសំខាន់ៗនិងពិភាក្សាយ៉ាងផុសផុលលើប្រធានបទចំនួន ០៦ រួមមាន៖
១, ការបោះជំហានប្រកបដោយភាពធន់រឹងមាំនៃវិស័យកសិកម្មនៅអាស៊ាន
២, បរិបទនៃការវិនិយោគ និងការរក្សាទ្រព្យសម្បត្តិ នៅចំពេលដែលស្ថានភាពសេដ្ឋកិច្ចសកលមិនទាន់មានភាពប្រាកដប្រជា
៣, ពន្ធគយរបស់អាមេរិក និងកំណែទម្រង់ពាណិជ្ជកម្មសកលបន្ទាប់ពីការរងនូវសម្ពាធពន្ធគយ (Trump Tariff)
៤, ការធ្វើឱ្យប្រសើរឡើងនូវខ្សែច្រវាក់ផ្គត់ផ្គង់ សម្រាប់កំណើនអនាគតនៃវិស័យភស្ដុភារកម្ម
៥, រូបិយបណ្ណឌីជីថល និងអនាគតនៃហិរញ្ញវត្ថុសកល
និង៦, ការចាប់ក្រសោបយកឱកាស និងការពង្រឹងនវានុវត្តន៍ ដើម្បីភាពប្រកួតប្រជែងក្នុងវិស័យទេសចរណ៍។
