ខេត្តព្រះសីហនុ មានបេក្ខជនសរុប ២,២២៤នាក់ ចូលរួមប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤ -២០២៥

ព្រឹកថ្ងៃព្រហស្បតិ៍ ទី២៨ ខែសីហា ឆ្នាំ២០២៥ ឯកឧត្តម សុខ គាង រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងឯកឧត្តម ម៉ាង ស៊ីណេត អភិបាល នៃគណ: អភិបាលខេត្តព្រះសីហនុ  បានអញ្ជើញបើកកញ្ចប់វិវិញ្ញាសារដំណើរការសំណេរប្រឡងសញ្ញា បត្រមធ្យម សិក្សាទុតិយភូមិសម័យប្រឡងថ្ងៃទី២៨ ដល់២៩ ខែសីហា ឆ្នាំ២០២៥ នៅសាលាវិទ្យាល័យ ហ៊ុន សែន មិត្តភាព ស្ថិតនៅសង្កាត់លេខ៤ ក្រុងព្រះសីហនុ ។

យោងតាមលោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុ បានឲ្យដឹងថា ឆ្នាំសិក្សា ២០២៤-២០២៥ ខេត្តព្រះ សីហនុ មានមណ្ឌលប្រឡងសញ្ញាបត្រមធ្យមសិក្សាទុតិយភូមិចំនួន ៥មណ្ឌល ក្នុងនោះក្រុងព្រះសីហនុ មាន៣មណ្ឌល និងស្រុកព្រៃនប់មាន ២មណ្ឌល ស្មើ នឹង ៩២បន្ទប់ ដែលមានបេក្ខជនសរុបចំនួន ២,២២៤នាក់ ស្រី

១,១៥០នាក់ ក្នុងការប្រឡងសញ្ញាបត្រមធ្យមសិក្សទុតិយភូមិមានគណមេប្រយោគទូទាំងខេត្តចំនួន ៤នាក់ ស្រី ២នាក់ អង្គភាពប្រឆាំងអំពើពុករលួយ ៨នាក់ អប្បមាទូទាំងខេត្តចំនួន ១១នាក់ ស្រី ៣នាក់ ជំនួយការអប្បមាទ ៥១នាក់ ស្រី ៤០នាក់ ។

ក្នុងឱកាសបើកស្រោមសំណេរឯកសារវិញ្ញាសារប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០២៤-២០២៥ នៅសាលាវិទ្យាល័យ ហ៊ុន សែន មិត្តភាព ឯកឧត្តម ម៉ាង ស៊ីណេត អភិបាល ខេត្តព្រះសីហនុ មានប្រសាសន៍សំណេះសំណាលជាមួយប្អូនៗជាសិស្សថ្នាក់ទី១២ ទាំងអស់ ដោយគូសបញ្ជាក់ថា ថ្ងៃនេះជាមោទនភាពដែលប្អូនៗបានខិតខំសិក្សារៀនសូត្ររយ:ពេល ១២ឆ្នាំកន្លងមក ហើយសម្រាប់ថ្ងៃនេះប្អូនៗត្រូវបញ្ចេញឱ្យអអស់លទ្ធភាពនូវចំណេះដឹងរបស់ប្អូនៗដែលទទួលបាននាពេលកន្លងមក ព្រោះកាល ណាបើយើងចេះ យើងនឹងប្រឡង ជាប់ទាំងអស់គ្នា និងសូមជូនពរឪ្យប្អូនៗប្រឡងឪ្យបានជាប់ទាំងអស់ គ្នា និងទទួលបាននិទ្ទេស A គ្រប់ គ្នា ហើយបើប្អូនប្រឡងទទួលបាន និទ្ទេស A និងទទួលបានរង្វាន់លើកទឹកចិត្តពីរដ្ឋបាលខេត្ត ក៏ដូចជាឯកឧត្តម ប្រធានក្រុមការ ងាររាជរដ្ឋាភិបាលចុះមូលដ្ឋានខេត្តព្រះសីហនុផងដែរ ។

ឯកឧត្តម អភិបាលខេត្តព្រះសីហនុ បានបញ្ចាក់បន្ថែមទៀតថា ចំពោះវិញ្ញាសារត្រូវបានចាក់សោបិទជិតល្អ មិនមានការរហែកនោះទេ ទន្ទឹមនោះដោយ មានការចូលរួមពិនិត្យលើស្រោមសំណេរពីគណ:មេប្រយោគ និងបេក្ខជនប្រឡងបានចុះហត្ថលេខាលើសំណេរប្រឡងផងដែរ ។

សូមបញ្ជាក់ថា នៅព្រឹកថ្ងៃទី២៨ ខែសីហា ឆ្នាំ២០២៥នេះ នៅតាមមណ្ឌលប្រឡងទាំង ៥នៅក្នុងក្រុងព្រះសីហនុ ក៏ដូចជាមណ្ឌលក្នុងស្រុកព្រៃនប់ មានសភាពស្ងៀម ស្ងាត់ល្អ ដោយមានការចូលរួមការពារសន្តិសុខ សុវត្ថិភាពដោយកងកម្លាំងសមត្ថកិច្ចមានដូចជា កម្លាំងស្នងការនគរបាល និងកងរាជអាវុធហត្ថផងដែរ ។