ក្រសួងអប់រំ នឹងដាក់ឱ្យអនុវត្តសាកល្បងគន្លងអប់រំថ្មី ចាប់ពីថ្នាក់ទី១០ ឡើងទៅ ដើម្បីជួយសិស្សចាប់យកជំនាញច្បាស់លាស់

ភ្នំពេញ ៖ ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឱ្យដឹងថា សម្រាប់ការសិក្សាឆ្នាំថ្មី ក្រសួងនឹងដាក់ឱ្យអនុវត្តគន្លងអប់រំថ្មី ដើម្បីជួយសិស្សចាប់យកជំនាញច្បាស់លាស់ និងអភិវឌ្ឍធនធានមនុស្សកម្ពុជាឱ្យកាន់តែរឹងមាំ។ គន្លងអប់រំថ្មីរួមមាន ថ្នាក់គន្លងវិទ្យាសាស្រ្ត វិទ្យាសាស្រ្តសង្គម និងគន្លងវិជ្ជាជីវៈ ចាប់ពីថ្នាក់ទី១០ ឡើងទៅ។

នៅក្នុងកិច្ចប្រជុំស្តីពី ការអនុវត្តសាកល្បងគន្លងអប់រំថ្មី នៅវិទ្យាល័យទេពប្រណម្យ ខេត្តកណ្តាល រដមន្រ្តីក្រសួងអប់រំ បានឱ្យដឹងថា ក្រសួងអប់រំនឹងសាកល្បងអនុវត្តគន្លងអប់រំថ្មីនៅឆ្នាំសិក្សា២០២៥-២០២៦ ខាងមុខ។ ការសាកល្បងអនុវត្តគន្លងអប់រំថ្មីរួមមាន គន្លងវិទ្យាសាស្រ្ត វិទ្យាសាស្រ្តសង្គម និងគន្លងវិជ្ជាជីវៈ នឹងដាក់ឱ្យអនុវត្តចាប់ពីថ្នាក់ទី១០ នៅតាមវិទ្យាល័យគោលដៅមួយចំនួន។

គ្រឹះស្ថាន និងវិទ្យាល័យគោលដៅដែលក្រសួងត្រៀមដាក់ឱ្យអនុវត្តសាកល្បងទាំងនោះរួមមាន វិទ្យាល័យដែលមានអគារធនធាន, វិទ្យាល័យមានមជ្ឈមណ្ឌលបច្ចេកវិទ្យាឌីជីថលសហគមន៍, គ្រឹះស្ថានសិក្សាអប់រំបច្ចេកទេស,វិទ្យាល័យស្ថិតនៅក្បែរតំបន់សេដ្ឋកិច្ចពិសេស និងតំបន់ដែលមានដំណើរការសេដ្ឋកិច្ច។ លោក ហង់ជួន ណារ៉ុន បញ្ជាក់ថា៖«ការអនុវត្តគន្លងសិក្សាថ្មី នឹងជួយឱ្យសិស្សមានលទ្ធភាពទទួលបានការអប់រំមួយដែលមានជំនាញច្បាស់លាស់ និងកាត់បន្ថយអត្រាបោះបង់ការសិក្សារបស់សិស្សដែលសាលារៀនស្ថិតនៅកម្រិតខ្ពស់ និងមានភាពទាក់ទាញឱ្យមានការចូលរួមកាន់តែខ្លាំងឡើងពីសហគមន៍សាលារៀន»។

ឯកឧត្តមឧបនាយករដ្ឋមន្ត្រី បានស្នើឱ្យក្រុមការងារគោលនយោបាយ ត្រូវសហការជាមួយក្រសួងការងារ និងបណ្ដុះបណ្ដាលជំនាញវិជ្ជាជីវៈ បន្តសិក្សាបន្ថែមពីទីផ្សារការងារ និងជំនាញដែលមានតម្រូវការនាពេលបច្ចុប្បន្ន និងអនាគត កែប្រែទស្សនទានពាក់ព័ន្ធនឹងការបណ្ដុះបណ្ដាលបច្ចេកទេសវិជ្ជាជីវៈ ដែលនេះមិនមែនសម្រាប់តែសិស្សរៀនខ្សោយទេ សិស្សដែលខ្លាំងក៏អាចចូលរៀនបានដែរ៕