ក្រសួងសង្គមកិច្ច ប្រារព្ធទិវាអន្តរជាតិនៃគ្រួសារ ១៥ ឧសភា ក្រោមប្រធានបទ «ការវិនិយោគលើសេដ្ឋកិច្ចគ្រួសារ នាំឱ្យសង្គមជាតិរីកចម្រើន និងមានសុខសន្តិភាព»

ក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំប្រារព្ធពិធីអបអរសាទរទិវាអន្តរជាតិនៃគ្រួសារ ១៥ ឧសភា ខួបលើកទី៣៣ ឆ្នាំ២០២៦ ក្រោមអធិបតីភាព ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគណៈកម្មការជាតិពិគ្រោះយោបល់គោលនយោបាយចំពោះគ្រួសារ ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំ មន្ត្រីរាជការ តំណាងក្រសួង-ស្ថាប័នពាក់ព័ន្ធ អង្គការដៃគូជាតិ-អន្តរជាតិ និងបងប្អូនតំណាងគ្រួសារជាច្រើនរូបទៀត។

​កម្មវិធីនេះបានប្រារព្ធឡើងនៅសាលប្រជុំនៃទីស្តីការក្រសួងសង្គមកិច្ច ដើម្បីបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការលើកកម្ពស់គុណតម្លៃគ្រួសារ ដែលជាកោសិកាសង្គមដ៏សំខាន់បំផុត។
​
​នៅក្នុងឱកាសនោះ ឯកឧត្តម រដ្ឋមន្ត្រី ជា សុមេធី បានគូសបញ្ជាក់យ៉ាងច្បាស់ថា គ្រួសារគឺជាកោសិកាមួយដ៏សំខាន់ក្នុងការដើរតួនាទីជាបង្អែកបណ្តុះបណ្តាល និងកសាងធនធានមនុស្សឱ្យមានគុណភាពខ្ពស់ សុខុមាលភាពល្អ និងមានភាពរឹងមាំផ្នែកសេដ្ឋកិច្ច។ ការវិនិយោគលើសេដ្ឋកិច្ចគ្រួសារ មិនត្រឹមតែជួយកាត់បន្ថយភាពក្រីក្រ និងបង្កើនតម្លៃសង្គមប៉ុណ្ណោះទេ ប៉ុន្តែថែមទាំងស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលចាត់ទុក «មនុស្ស» និង «ការអភិវឌ្ឍសេដ្ឋកិច្ច» ជាស្នូល។
​
ឯកឧត្តមរដ្ឋមន្ត្រី ក៏បានពាំនាំនូវការសាកសួរសុខទុក្ខ និងក្តីនឹករលឹកយ៉ាងជ្រាលជ្រៅពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ច័ន្ទមុន្នី ជូនចំពោះថ្នាក់ដឹកនាំ មន្ត្រីរាជការ និងបងប្អូនប្រជាពលរដ្ឋគ្រប់រូប ជាពិសេសក្រុមគ្រួសារខ្មែរនៅទូទាំងប្រទេស។
​
​ស្របតាមទិសដៅយុទ្ធសាស្ត្ររបស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត ក្រសួងសង្គមកិច្ចបាន និងកំពុងអនុវត្តយ៉ាងសកម្មនូវកម្មវិធីជាតិជំនួយសង្គមក្នុងកញ្ចប់គ្រួសារ ដើម្បីគាំទ្រដល់គ្រួសារក្រីក្រ និងងាយរងគ្រោះ រួមមាន៖
១. កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ
២. កម្មវិធីអាហារូបករណ៍សម្រាប់សិស្សក្រីក្រនៅកម្រិតបឋមសិក្សា និងមធ្យមសិក្សាចំណេះទូទៅ
៣. កម្មវិធីឧបត្ថម្ភសាច់ប្រាក់ជូនជនមានពិការភាព
៤. កម្មវិធីឧបត្ថម្ភសាច់ប្រាក់ជូនជនចាស់ជរា (អាយុ ៦០ឆ្នាំឡើង)
​
បន្ថែមលើនេះ រាជរដ្ឋាភិបាលបានដាក់ចេញនូវគោលការណ៍លើកកម្ពស់ និងពង្រីកការគ្របដណ្តប់របបថែទាំសុខភាព (ប.ស.ស.) តាមរយៈមូលនិធិសមធម៌សុខាភិបាល ជូនដល់គ្រួសារជនរងគ្រោះ គ្រួសារជនមរណៈ និងក្រុមគ្រួសារអតីតមន្ត្រីរាជការស៊ីវិល និងអតីតយុទ្ធជន ដើម្បីធានាបាននូវសមធម៌សង្គម និងសុខសន្តិភាពផ្លូវចិត្ត។
​បញ្ហាប្រឈមក្នុងយុគសម័យបច្ចេកវិទ្យា
​ទន្ទឹមនឹងភាពរីកចម្រើននៃបច្ចេកវិទ្យា និងសកលភាវូបនីយកម្ម ឯកឧត្តមរដ្ឋមន្ត្រីក៏បានដាស់តឿនអំពីផលប៉ះពាល់អវិជ្ជមានមួយចំនួនដែលកំពុងគំរាមកំហែងដល់ស្ថិរភាពគ្រួសារ ដូចជាការចុះខ្សោយនៃវប្បធម៌ទំនៀមទម្លាប់ ការប្រព្រឹត្តបទល្មើស ការប្រើប្រាស់សារធាតុញៀន អំពើហិង្សាក្នុងគ្រួសារ និងការបោះបង់ចោលកុមារ ឬមនុស្សចាស់។ បញ្ហាប្រឈមទាំងនេះ ទាមទារឱ្យមានការចូលរួមដោះស្រាយរួមគ្នាពីគ្រប់ស្ថាប័នពាក់ព័ន្ធ អង្គការដៃគូ និងសហគមន៍ទាំងមូល។
​
កិច្ចបញ្ចប់នៃកម្មវិធី ថ្នាក់ដឹកនាំក្រសួងបានប្រគល់លិខិតថ្លែងអំណរគុណជូនដល់តំណាងវិស័យឯកជន និងអង្គការដៃគូចំនួន ១០ ដែលបានចូលរួមគាំទ្រកម្មវិធីយ៉ាងសកម្ម (ដូចជា ធនាគារវីង, អង្គការដៃគូកម្ពុជា, អង្គការមូលនិធិសប្បុរសធម៌, អង្គការពេទ្យកម្ពុជា, អង្គការទឹកចិត្តម្តាយ, អង្គការ Dail Community, អង្គការទំនុកចិត្តកុមារកម្ពុជា, អង្គការម៉ារីស្តុប, អង្គការ CBN និងអង្គការចិត្តសង្គមអន្តរវប្បធម៌)។
​ទន្ទឹមនឹងនោះ ឯកឧត្តមក៏បានចែកជូននូវវត្ថុអនុស្សាវរីយ៍ និងថវិកាឧបត្ថម្ភជូនដល់តំណាងគ្រួសារចំនួន ២០០នាក់ ដោយក្នុងម្នាក់ៗទទួលបាន៖ ថវិកា ២០,០០០ រៀល, ក្រមា ១, សារុង ១ និងអាវយឺត ១។