ក្រសួងធម្មការនិងសាសនា កំពុងបន្តផ្សព្វផ្សាយ “នាទីព្រះពុទ្ធសាសនាផ្សារភ្ជាប់នឹងសង្គម” យ៉ាងទូលំទូលាយលើវិទ្យុ-ទូរទស្សន៍រដ្ឋ និងឯកជន មកដល់លើកទី៣៣៥ ស្មើនឹង១១៣០មាតិកាព្រះធម៌

ថ្លែងក្នុងពិធីបើក “នាទីព្រះពុទ្ធសាសនាផ្សារភ្ជាប់នឹងសង្គម” ឯកឧត្តម នរៈ រតនវឌ្ឍនោ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា បានមានប្រសាសន៍ថាក្រសួងធម្មការនិងសាសនា កំពុងការបន្តផ្សព្វផ្សាយ “នាទីព្រះពុទ្ធសាសនាផ្សារភ្ជាប់នឹងសង្គម” យ៉ាងទូលំទូលាយលើវិទ្យុ-ទូរទស្សន៍រដ្ឋ និងឯកជនចំនួន២៣ស្ថានីយ៍ បានឈាមមកដល់លើកទី៣៣៥ ស្មើនឹង១១៣០ មាតិកាព្រះធម៌ហើយ តបតាមអនុសាសន៍ណែនាំដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែតនិងលោកជំទាវបណ្ឌិត ។

ឯកឧត្តម រដ្ឋលេខាធិការ បានមានប្រសាសន៍ថា កម្មវិធីនាទីព្រះពុទ្ធសាសនាផ្សារភ្ជាប់នឹងសង្គម ត្រូវបានរៀបចំឡើង ក្រោមគំនិតផ្តួចផ្តើមដ៏ខ្ពង់ ខ្ពស់របស់សម្តេចអគ្គមហាសេនា បតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន និងបានបន្តអនុវត្តផ្សព្វផ្សាយយ៉ាងទូលំទូលាយ តាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត កម្មវិធីនេះក៏ត្រូវបាន បន្តអនុវត្តនិងផ្សព្វផ្សាយ ជាបន្តបន្ទាប់បានមកដល់លើកទី ៣៣៥ ស្មើរនឹង១១៣០មាតិកាព្រះធម៌ ហើយទទួលបានការគាំទ្រយ៉ាងច្រើនពីសំណាក់ប្រជាពលរដ្ឋ។

ក្រោមការចង្អុលបង្ហាញរបស់ ឯកឧត្តមរដ្ឋមន្រ្តី ចាយ បូរិន ដោយផ្សារភ្ជាប់វិស័យពុទ្ធចក្រនិងអាណាចក្រ បានអនុញ្ញាតឲ្យ អគ្គនាយកដ្ឋាននាយកដ្ឋានស្រាវជ្រាវនិងផ្សព្វផ្សាយកិច្ចការសាសនាផ្សារភ្ជាប់សង្គម សហការជាមួយនឹងអគ្គនាយកដ្ឋានវិទ្យុ-ទូរទស្សន៍រដ្ឋ និងឯកជន បាននិងកំពុងបន្តរៀបចំដឹកនាំផ្សព្វផ្សាយ ដើម្បីបញ្ជ្រាបការយល់ដឹង អប់រំ ទូន្មានដល់កុលបុត្រខ្មែរ ដើម្បីឱ្យប្រកាន់ភ្ជាប់នូវអំពើល្អ សទ្ធាជ្រះថ្លា យក ព្រះធម៌ ជាគោល មក ពិចារណា អ្វីមួយដោយធម៌ ពិសេសទូន្មានសិស្ស និស្សិតឱ្យស្គាល់នូវបុណ្យ បាប និងត្រូវយកចិត្តទុកដាក់ខិតខំប្រឹងប្រែងរៀនសូត្រ។

ក្នុងឱកាសនេះ លោក កែវ ហេង ប្រធាននាយកដ្ឋានស្រាវជ្រាវនិងផ្សព្វផ្សាយកិច្ចការសាសនាផ្សារភ្ជាប់សង្គម បានជម្រាបជូនថា ការសម្តែងព្រះធម៌ទេសនានេះ ពិតជាបានចូលរួមចំណែកយ៉ាងធំធេងដល់ការអប់រំក្នុងសង្គម ក្នុងនោះរួមមាន៖
១-ព្រះធម៌ទេសនាជួយអប់រំទូន្មាន កូនខ្មែរគ្រប់រូបឱ្យប្រកាន់ខ្ជាប់នូវអំពើល្អ សីលធម៌ គុណធម៌ ចរិយាធម៌សេចក្តីថ្លៃថ្នូរនៅក្នុងសង្គម។
២-បង្ការការរីករាលដាលមេរោគអេដស៍ និងជំងឺអេដស៍។
៣-ចៀសផុតពីគ្រឿងញៀន គ្រឿងស្រវឹង ពីការជួញដូរមនុស្ស។
៤-ចៀសផុតពីអំពើហិង្សាក្នុងគ្រួសារ និងក្នុងសង្គម អំពើហិង្សាលើស្ត្រី និង កុមារ។
៥-បង្ការគ្រោះថ្នាក់ចរាចរណ៍
៦-ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ។
៧-រួម ចំណែករក្សា ភូមិ ឃុំ មានសុវត្ថិភាព។
៨-អក្ខរកម្មឆ្ពោះទៅរកការសិក្សាពេញមួយជីវិត។
៩-ការចិញ្ចឹមកូនបែប វិជ្ជមាន។
១០-ជួយផ្សព្វផ្សាយពីហានីភ័យ ដែលកើតឡើងពីផ្សែងធូប ផ្សែងភ្លើងទៀន ធ្វើយ៉ាងណាឱ្យពួកគាត់កាត់បន្ថយ ព្រោះបង្កគ្រោះថ្នាក់ដល់សុខភាពខ្លាំងណាស់។

សូមជម្រាបជូនថា នាទីព្រះពុទ្ធសាសនាផ្សារភ្ជាប់នឹងសង្គមលើកទី ៣៣៥ ស្មើនឹង១១៣០ មាតិកាព្រះធម៌ នាឱកាសនេះ មានការនិមន្តសម្តែងព្រះធម៌ទេសនា ដោយព្រះចំរុងបំរុងរតន៍សាសន៍សិក្ខាមុនី វុឹង ចំរ៉ុង , ព្រះបទុមពិសិដ្ឋជ័យមុនី ប៉ែន ពិសិដ្ឋ, ព្រះគ្រូសិង្ហមង្គល ទូច សិលា និងមានការអញ្ជើញចូលរួមពី ឯកឧត្តម លោកជំទាវ មន្រ្តីរាជការ លោក លោកស្រី លោកគ្រូ អ្នកគ្រូ តាជី យាយជី សីលវ័ន សីលវត្តី និងសិស្សានុសិស្សយ៉ាងច្រើនកុះករ៕