កិច្ចប្រជុំគណៈកម្មាធិការសម្របសម្រួលរួមលើកទី២ នៃគម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធលូទឹកកខ្វក់ របស់រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ជំហានទី២

កិច្ចប្រជុំគណៈកម្មាធិការសម្របសម្រួលរួមលើកទី២ នៃគម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធលូទឹកកខ្វក់ របស់រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ជំហានទី២ បានប្រារព្វធ្វើនៅព្រឹកថ្ងៃពុធ ទី២៧ ខែសីហា ឆ្នាំ២០២៥ ក្រោមអធិបតីភាព ឯកឧត្តមបណ្ឌិត រស់ វណ្ណា រដ្ឋលេខាធិការ តំណាងឯកឧត្តម ប៉េង ពោធិ៍នា រដ្ឋមន្រ្តីក្រសួងសា ធារណការ និងដឹកជញ្ជូន ឯកឧត្តម ហួត ហៃ អភិបាលរងរាជធានីភ្នំពេញ តំណាងឯកឧត្តម ឃួង ស្រេង អភិបាល នៃគណៈ អភិបាល រាជធានីភ្នំពេញ និងលោកស្រី មីយ៉ាស៊ូតា អាគីកូ (MIYASHITA AKIKO), តំណាងជាន់ខ្ពស់ការិយាល័យ JICA ប្រចាំកម្ពុជា ។

លោកស្រី មីយ៉ាស៊ូតា អាគីកូ បានមានប្រសាសន៍ថា ថ្ងៃនេះជាព្រឹត្តិការណ៍ដ៏សំខាន់មួយចាប់តាំងពីការចាប់ផ្តើមគម្រោង នៅឆ្នាំ 2024 យើងមានការរីកចម្រើនគួរឱ្យកត់សម្គាល់នៅក្នុងផែនការសេវាលូរយៈពេលមធ្យម រយៈពេលវែង រួមទាំងការ យល់ដឹងជាសាធារណៈ ការអភិវឌ្ឍន៍ប្រកាស និងការអភិវឌ្ឍន៍សមត្ថភាពធនធានមនុស្ស។ លោកស្រី រំពឹងថា ក្រសួងសាធា រណការ និងដឹកជញ្ជូន និងរដ្ឋបាលរាជធានីភ្នំពេញ នឹងរក្សាភាពជាម្ចាស់ដ៏រឹងមាំរបស់ខ្លួន ដើម្បីដឹកនាំគម្រោង និងការសម្របសម្រួលរបស់ក្រសួងពាក់ព័ន្ធ ក៏ដូចជាការចូលរួមជាបន្តបន្ទាប់របស់ខ្លួន ជាមួយភាគីពាក់ព័ន្ធ ដើម្បីដឹងពីការអភិវឌ្ឍន៍បន្ថែមទៀតនៃបរិស្ថានទឹកនៅកម្ពុជា។ ភាពជោគជ័យនៃគម្រោងនេះគឺអាស្រ័យលើការខិតខំប្រឹងប្រែងរួមគ្នារបស់អ្នកទាំងអស់គ្នានៅទីនេះ។

ឯកឧត្តម ហួត ហៃ បានមានប្រសាសន៍ថា ស្ថានីយប្រព្រឹត្តកម្មទឹកកខ្វក់ ពិតជាមានសារៈសំខាន់ណាស់ ក្នុងការជួយដល់សុខុ មាលភាពប្រជាពលរដ្ឋកម្ពុជា។ ចំណែកគម្រោង អភិវឌ្ឍន៍សមត្ថភាពគ្រប់គ្រងប្រព័ន្ធទឹកកខ្វក់វិញ ក៏ត្រូវតែដើរទន្ទឹមគ្នា និងមិនអាចខ្វះបាន ដើម្បីធានាដល់ការគ្រប់គ្រង ការរៀបចំ ផែនការ ក្នុងការថែទាំ ការបង្កើនសមត្ថភាពជំនាញ ការអនុវត្តច្បាប់ លិខិតបទដ្ឋានគតិយុត្តពាក់ព័ន្ធ ក៏ដូចជាជំរុញឱ្យការផ្សព្វផ្សាយ ពង្រីកការយល់ដឹងឱ្យបានកាន់តែទូលំទូលាយដល់គ្រប់ស្រទាប់ មហាជន ទាក់ទាញឱ្យមានការចូលរួមពីគ្រប់មជ្ឈដ្ឋាន សំដៅ ទៅរកការកែប្រែឥរិយាបថក្នុងការរស់នៅ ស្របតាមយុគ្គសម័យថ្មី នៃការអភិវឌ្ឍន៍ទីក្រុងប្រកបដោយសុខុមាលភាព
និរន្តរភាព។តាមរយៈកិច្ចប្រជុំលើកទី២នេះ លោកសង្ឃឹមថា នឹងទទួលបាននូវធាតុចូលបន្ថែមជាច្រើនទៀត ពីឯកឧត្តម លោក លោកស្រី ដែលជា សមាជិក សមាជិកានៃកិច្ចប្រជុំរបស់យើង ដើម្បីរាជធានីភ្នំពេញ ឈានឆ្ពោះទៅសម្រេចបាននូវចក្ខុវិស័យរួមគ្នា គឺការគ្រប់គ្រង និងប្រែក្លាយទឹកកខ្វក់ទៅជាទឹកស្អាត មុននឹងបង្ហូរចូលទៅទន្លេធម្មជាតិ ប្រកបដោយនិរន្តរភាព។

នៅក្នុងកិច្ចប្រជុំលើកទី២ នាថ្ងៃនេះ ក៏មានការធ្វើបទបង្ហាញដោយអ្នកជំនាញការរបស់ទីភ្នាក់ងារសហប្រតិបត្តិការ អន្តរជាតិជប៉ុន និងអ្នកជំនាញអញ្ជើញមកពីក្រសួងសាធារណការ និងដឹកជញ្ជូន និងមន្ត្រីបច្ចេកទេសអនុវត្តផ្ទាល់ របស់មន្ទីរ សាធារណការ និងដឹកជញ្ជូនរាជធានីភ្នំពេញ ផងដែរ។

ថ្លែងបិទកិច្ចប្រជុំ ឯកឧត្តមបណ្ឌិត រស់ វណ្ណា បានមានប្រសាសន៍ថា គម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធលូទឹកកខ្វក់ របស់រដ្ឋបាលរាជធានីភ្នំពេញ និងក្រសួងសាធារណការនិងដឹកជញ្ជូន ជំហានទី២ ដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុនJICA ក្នុងវិស័យទឹកកខ្វក់ត្រូវបានជ្រើសរើសជាអាទិភាពខ្ពស់។ គម្រោងនេះនឹងក្លាយជា ផ្នែកដ៏សំខាន់មួយនៃ ផែនការនាពេលអនាគត សម្រាប់ការកែ លម្អបរិស្ថានដើម្បីលើកកម្ពស់ជីវភាព និងសុខភាពសាធារណៈ នៅរាជធានីភ្នំពេញ។ ឯកឧត្តមបណ្ឌិតបានជម្រាបជូនថា កន្លងមក និងបច្ចុប្បន្ន តាមរយៈ កិច្ចសហប្រតិបត្តិការអន្តរជាតិរបស់ប្រទេសជប៉ុន យើងបានទទួលគម្រោងមួយចំនួន តាមរយៈជំនួយឥតសំណងរបស់ប្រទេសជប៉ុនដូចជា គម្រោងការពារទឹកជំនន់ និងការកែលម្អប្រព័ន្ធលូ គម្រោងកសាងសមត្ថ ភាពលើការងារថែទាំប្រព័ន្ធលូ និងវិធានការបង្ការការខូចខាតគ្រោះមហន្តរាយ ដោយសារទឹកជំនន់ក្នុងរាជធានីភ្នំពេញ និងគម្រោងអភិវឌ្ឍន៍ប្រព័ន្ធទឹកកខ្វក់ ដែលបានសាងសង់ស្ថានីយប្រព្រឹត្តកម្មទឹកកខ្វក់ក្នុងរាជធានីភ្នំពេញ ដែលបានបញ្ចប់នៅចុងឆ្នាំ២០២៣ និងគម្រោងផ្សេងទៀត។ គម្រោង ទាំងអស់នេះគឺស្របតាមយុទ្ធសាស្ត្របញ្ចកោណ ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និង ចីរភាព និងអាទិភាពគន្លឹះចំនួន ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា សំដៅកសាងមូលដ្ឋានគ្រឹះឆ្ពោះទៅសម្រេចបាននូវ ចក្ខុវិស័យកម្ពុជាឆ្នាំ២០៥០ ជាប្រទេសចំណូលខ្ពស់។ ជាមួយគ្នានេះ ការអភិវឌ្ឍទីក្រុង ក៏ត្រូវបានកំណត់យ៉ាងច្បាស់លាស់នៅក្នុងយុទ្ធសាស្ត្របញ្ចកោណនេះផងដែរ គឺនៅត្រង់ចំណុចទី៣ នៃមុំទី៤ ក្នុងបញ្ចកោណទី៤ ដែលកំណត់អំពី “ការរៀបចំផែនការមេ អភិវឌ្ឍហេដ្ឋារចនាសម្ព័ន្ធទីក្រុង និងទីប្រជុំជនសំខាន់ៗ ប្រកប ដោយភាពធន់ និងសោភ័ណភាព ការជំរុញការប្រើប្រាស់សេវាដឹកជញ្ជូនសាធារណៈក្នុងទីក្រុង, ការគ្រប់គ្រង ទុកដាក់ និងកែច្នៃសំរាម, ការពង្រីកបណ្តាញទឹកស្អាត, ប្រព័ន្ធលូរំដោះទឹកភ្លៀង, ប្រព័ន្ធចម្រោះ និងប្រព្រឹត្តកម្មទឹកកខ្វក់”។ ឯកឧត្តមបណ្ឌិត រស់ វណ្ណា សូមថ្លែងអំណរ គុណយ៉ាងជ្រាលជ្រៅ ចំពោះរដ្ឋាភិបាលជប៉ុន ប្រជាជនជប៉ុន JICA និងក្រុមការងាររបស់ក្រសួងសា ធារណការ និងដឹក ជញ្ជូន រដ្ឋបាលរាជធានីភ្នំពេញ និងមន្ទីរសាធារណ ការ និងដឹកជញ្ជូនរាជធានីភ្នំពេញ សម្រាប់កិច្ចខិតខំប្រឹងប្រែងជាបន្តបន្ទាប់ ដើម្បីសម្រេចបាននូវលទ្ធផលដែលបានកើតឡើងនាថ្ងៃនេះ៕