កងទ័ពជើងទឹកភូមិន្ទកម្ពុជា ទទួលស្វាគមន៍ដំណើរទស្សនកិច្ចផ្លូវការរបស់នាវាចម្បាំងឥណ្ឌា INS Kulish នៅមូលដ្ឋានសមុទ្ររាម

ខេត្តព្រះសីហុ៖ នាព្រឹកថ្ងៃទី១២ ខែកញ្ញា ឆ្នាំ២០២៦ វេលាម៉ោង ៩:៣០នាទីព្រឹក នាវាចម្បាំងកងទ័ពជើងទឹកឥណ្ឌា INS Kulish (P63) ប្រភេទនាវា CORVETTE បានចូលចតដោយសុវត្ថិភាពនៅមូលដ្ឋានសមុទ្ររាម ក្នុងដំណើរទស្សនកិច្ចផ្លូវការ រយៈពេល ៤ថ្ងៃ ចាប់ពីថ្ងៃទី១២ ដល់ថ្ងៃទី១៥ ខែកញ្ញា ឆ្នាំ២០២៦។
​ក្នុងពិធីទទួលស្វាគមន៍ ភាគីកម្ពុជាត្រូវបានដឹកនាំដោយលោកឧត្តមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម តំណាងកងទ័ពជើងទឹកភូមិន្ទកម្ពុជា ព្រមទាំងមានការចូលរួមពីនាយនាវី និងយោធិនជាច្រើនរូប ដោយឡែក ភាគីនាវាចម្បាំងឥណ្ឌា ត្រូវ បានដឹកនាំដោយ លោកវរនាវីទោ Suraj Kumar Singh មេបញ្ជាការនាវា រួមដំណើរដោយនាយនាវីចំនួន ១២នាក់ និងនាវឹកចំនួន ១២០នាក់ (សរុប ១៣១នាក់) ពិធីទទួលស្វាគមន៍នេះ បានប្រព្រឹត្តទៅក្នុងបរិយាកាសស្និទ្ធស្នាល និងសម្ដែងនូវមិត្តភាពយ៉ាងជ្រាលជ្រៅរវាងកងទ័ពនៃប្រទេសទាំងពីរ ​នៅក្នុងអំឡុងពេលនៃដំណើរទស្សនកិច្ចនេះ កងទ័ពជើងទឹកទាំងពីរ (កម្ពុជា-ឥណ្ឌា) នឹងជួបពិភាក្សាការងារជាលក្ខណៈមិត្តភាព ដើម្បីបង្កើនទំនាក់ទំនង ក៏ដូចជាធ្វើលំហាត់ផ្លាស់ប្តូរបទពិសោធនិងគ្នាទៅវិញទៅមក។
​ដំណើរទស្សនកិច្ចរបស់នាវា INS Kulish (P63) មកកាន់កម្ពុជានិងបណ្តាប្រទេសក្នុងតំបន់អាស៊ាននាពេលនេះ គឺស្ថិតក្នុងក្របខ័ណ្ឌនៃ «កិច្ចសហប្រតិបត្តិការលម្ហសមុទ្រ អាស៊ាន-ឥណ្ឌា ឆ្នាំ២០២៦» ដោយផ្តោតសំខាន់លើការរពង្រីកកិច្ចសហប្រតិបត្តិការសន្តិសុខផ្លូវទឹក ការងារមនុស្សធម៌ ការសង្គ្រោះគ្រោះមហន្តរាយ និងការជំរុញការអភិវឌ្ឍសេដ្ឋកិច្ចពណ៌ខៀវ ក្នុងតំបន់។
​ចំពោះបច្ចេកទេសរបស់នាវាចម្បាំងនេះមានលក្ខណៈ
​ប្រវែងបណ្តោយ៖ ៩១.១៦ ម៉ែត្រ
​ទទឹង៖ ១០.៣៦ ម៉ែត្រ
​ជម្រៅទឹក៖ ៤.២៧ ម៉ែត្រ
​ទម្ងន់ផ្ទុក៖ ១,៤៤៩ តោន
​ល្បឿនអតិបរមា៖ ៤៦.៣ គីឡូម៉ែត្រ

អត្ថបទ មនសូត្រ
ថត ដោយ អ៊ូ ជោត