ឯកឧត្តម ហេង សួរ រួមនិងបងប្អូនកម្មករនិយោជិតជាង៥ពាន់នាក់ ប្រារព្ធកម្មវិធីជប់លៀង អបអរសាទរទិវាសិទ្ធិនារីអន្តរជាតិ ៨មីនា ខួបទី១១៤

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា វត្តមានចូលរួមផ្ទាល់ជាមួយបងប្អូន ក្នុងពិធីអបអរសាទរទិវាសិទ្ធិនារីអន្តរជាតិ ៨មីនា គឺជាឱកាសដ៏ពិសេស ដែលបង្ហាញពីសាមគ្គីភាព ភាពស្និទ្ធិស្នាល ក្នុងការចូលរួមសប្បាយរីករាយជាមួយ បងប្អូនកម្មករនិយោជិត ជាពិសេសជាឱកាសមួយ ដែលអាចថ្លែងអំណរគុណ ចំពោះបងប្អូនដែលបានចូលរួម ក្នុងសកម្មភាពផលិតកម្ម ដែលបានរួមចំណែកយ៉ាងធំធេង ដល់ការអភិវឌ្ឍសេដ្ឋកិច្ចជាតិ។

ពិធីនេះរៀបចំឡើង នៅក្នុងបរិវេណក្រុមហ៊ុន សាប្រ៊ីណា (ខេមបូឌា) ហ្គារម៉ិន ម៉ាញូហ្វាក់ឆឺរីង ខប (SABRINA(CAMBODIA) GARMENT MANUFACTURING CORP.) ស្ថិតនៅផ្លូវជាតិលេខ៤ ក្នុងឃុំសំបូរ ស្រុកសំរោងទង ខេត្តកំពង់ស្ពឺ នាថ្ងៃសុក្រ ទី៧ ខែមីនា ឆ្នាំ២០២៥នេះ ក្រោមអធិបតី ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមពី បងប្អូនកម្មករនិយោជិត នៃក្រុមហ៊ុន សាប្រ៊ីណា ជាង៥៥០០នាក់ និងលោក គង់ អាទិត្យ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(C.CAWDU), នាយិកា ថ្នាក់ដឹកនាំ បុគ្គលិក នៃក្រុមហ៊ុន សាប្រ៊ីណា, តំណាងសម្ព័ន្ធសហជីព, រដ្ឋបាលខេត្ត ស្រុក មន្ទីរ ដើម្បីអបអរសាទរទិវាសិទ្ធិនារីអន្តរជាតិ ០៨មីនា ខួបទី១១៤។

នៅក្នុងមតិស្វាគមន៍ និងសំណេះសំណាលទៅកាន់អ្នកចូលរួមកម្មវិធីនេះ ឯកឧត្តមរដ្ឋមន្ត្រី បានលើកឡើងថា ស្ត្រីកម្ពុជាបានដើរតួនាទីយ៉ាងសំខាន់នៅក្នុងគ្រួសារ សង្គម និងប្រទេសជាតិ។ ស្ត្រីកម្ពុជាមិនមែននៅតែផ្ទះ ចាំតែធ្វើកិច្ចការផ្ទះ ចាំតែមើលថែកូន និងចាំតែ ប្រាក់ចំណូលពីស្វាមីនោះទេ។ ប្អូនៗ និងក្មួយៗស្ត្រី ដែលមិនទាន់មានគ្រួសារក៏ដោយ ក៏មិនមែននៅផ្ទះចាំឪពុកម្តាយ និងចាំបងប្អូនចិញ្ចឹមទំនុកបម្រុងនោះទេ។ ផ្ទុយទៅវិញ ប្អូនៗ និងក្មួយៗទាំងអស់គ្នាសុទ្ធតែបានមកធ្វើការផង និងផ្ញើប្រាក់ឧបត្ថម្ភដល់ឪពុកម្ដាយ កូនៗ និងប្អូនៗឱ្យបានចូលរួមរៀនសូត ផងដែរ។ ស្ត្រីកម្ពុជានៅពេលនេះ មិនមែនដូចពាក្យបុរាណពោលថា ”ស្ត្រីបង្វិលជើងក្រាន មិនជុំ” នោះទេ ពីព្រោះជាក់ស្តែង យើងមានតួរលេខ ដែលបង្ហាញយ៉ាងច្បាស់ថាស្ត្រី ពិតជាបានដើរតួយ៉ាងសំខាន់ក្នុងការជំរុញកំណើនសេដ្ឋកិច្ចប្រាកដមែន។

គួរបញ្ជាក់ថា ការប្រារព្ធកម្មវិធីជប់លៀង អបអរសាទរទិវាសិទ្ធិនារីអន្តរជាតិ ០៨ មីនា ខួបទី ១១៤ នៅក្នុងបរិវេណក្រុមហ៊ុន សាប្រ៊ីណា (ខេមបូឌា) នាពេលនេះ គឺជាការបង្ហាញនូវការជួបជុំគ្នាប្រកបដោយភាពសប្បាយរីករាយ សុខដុមរមនា រវាងបងប្អូនកម្មករនិយោជិត ភាគីនិយោជក និងភាគីសហជីព។ ក្នុងឱកាសនោះដែរ ឯកឧត្តមរដ្ឋមន្ត្រី ក៏បានប្រកាសផ្តល់ជូនអំណោយដ៏ថ្លៃថ្លារបស់សម្តេចធិបតី ជូនដល់បងប្អូនកម្មការិនីដែលមានផ្ទៃពោះលើសពីបីខែ និងកម្មករនិយោជិតមានពិការភាព ដែលកំពុងបំពេញការងារនៅក្រុមហ៊ុន សាប្រ៊ីណា (ខេមបូឌា) រួមនិងការផ្តល់ជូនជារង្វាន់កង្ហារចំនួន ១០០គ្រឿង ដែលឧបត្ថម្ភផ្ទាល់ពីឯកឧត្តមរដ្ឋមន្ត្រី ផងដែរ៕