ស្ថាប័នថ្នាក់ជាតិជំរុញលើកទឹកចិត្តឱ្យក្រុមការងាររាជរដ្ឋាភិបាល និងអាជ្ញាធរគ្រប់ជាន់ថា្នក់ បន្តខិតខំជំរុញការដោះស្រាយនូវការងារអាទិភាព ក្នុងគោលដៅបន្តលើកកម្ពស់ការផ្តល់សេវាសាធារណៈ និងការដោះស្រាយបញ្ហាប្រឈម សំណើ និងសំណូមពរនានាជូនប្រជាពលរដ្ឋ

នាព្រឹកថ្ងៃទី១០ ខែមីនា ឆ្នាំ២០២៥ ក្រុមការងាររាជរដ្ឋាភិបាលចុះមូលដ្ឋានស្រុកបាធាយ ខេត្តកំពង់ចាម និងរដ្ឋបាលស្រុកបាធាយ បានរៀបចំពិធីសំណេះសំណាលជាមួយមន្រ្តីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់ជាន់ថ្នាក់ជុំវិញស្រុកបាធាយ ខេត្តកំពង់ចាម ក្រោមអធិបតីភាពរបស់ ឯកឧត្តម អ៊ុច បូររិទ្ធ ប្រធានព្រឹទ្ធសភាស្តីទី និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ ខេត្តកំពង់ចាម និងខេត្តត្បូងឃ្មុំនិងឯកឧត្តមទេសរដ្ឋមន្រ្តី លី ធុជអនុប្រធានទី១ អាជ្ញាធរមីនកម្ពុជានិងជាអនុប្រធាន ក្រុមការងាររាជរដ្ឋាភិបាលចុះមូលដ្ឋានស្រុកបាធាយ។ ពិធីសំណេះសំណាលនេះ ប្រព្រឹត្តិទៅនៅសាលាស្រុកបាធាយ ដោយមានការចូលរួមពីសមាជិកព្រឹទ្ធសភា តំណាងក្រសួង-ស្ថាប័ន តំណាងគណៈអភិបាលខេត្ត ក្រុមការងាររាជរដ្ឋាភិបាលចុះមូលដ្ឋានស្រុកបាធាយ រដ្ឋបាលស្រុកបាធាយ មន្រ្តីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់ជាន់ថា្នក់។

តាងនាមឱ្យក្រុមការងាររាជរដ្ឋាភិបាលចុះមូលដ្ឋានស្រុកបាធាយ និងមន្រ្តីរាជការទាំងអស់ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានថ្លែងអំណរគុណយ៉ាងជ្រាលជ្រៅជូន ឯកឧត្តម អ៊ុច បូររិទ្ធ ប្រធានព្រឹទ្ធសភាស្តីទី ដែលបានចំណាយពេលដ៏មានតម្លៃក្នុងពិធីសំណេះសំណាលជាមួយមន្រ្តីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់ជាន់ថ្នាក់ ជុំវិញស្រុកបាធាយ ខេត្តកំពង់ចាម។

តាងនាម ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម ឯកឧត្តមទេសរដ្ឋមន្រ្តី លី ធុជ បានកោតសរសើរ និងវាយតម្លៃខ្ពស់ចំពោះសមាជិកក្រុមការងាររាជរដ្ឋាភិបាលចុះមូលដ្ឋានស្រុកបាធាយ និងរដ្ឋបាលស្រុកបាធាយគ្រប់ជាន់ថ្នាក់ ដែលបានប្តេជ្ញាចិត្តរួមគ្នាប្រកបដោយស្មារតីទទួលខុសត្រូវខ្ពស់ ក្នុងការថែរក្សាការពារសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សាធារណៈ លើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋានឱ្យមានភាពរីកចំរើនលើគ្រប់វិស័យ។

ជាមួយគ្នានោះឯកឧត្តម អ៊ុច បូររិទ្ធ ប្រធានព្រឹទ្ធសភាស្តីទីនិង ឯកឧត្តមទេសរដ្ឋមន្រ្តី លី ធុជ បានសម្តែងនូវការស្វាគមន៍ចំពោះការចូលរួមចំណែករបស់ ឯកឧត្តម ហែម ថេង អនុរដ្ឋលេខាធិការក្រសួងមហាផ្ទៃ ដែលត្រូវបានតែងតាំងជាប្រធានក្រុមការងាររាជរដ្ឋាភិបាលចុះមូលដ្ឋានឃុំជើងព្រៃ ក្នុងស្រុកបាធាយ ដើម្បីចូលរួមដោះស្រាយក្តីកង្វល់ សំណើ សំណូមពរ និងបញ្ហាប្រឈមនានារបស់ប្រជាពលរដ្ឋនៅមូលដ្ឋាន ជាពិសេសចូលរួមផ្សព្វផ្សាយនូវសមិទ្ធផលនានារបស់រាជរដ្ឋាភិបាលអាណត្តិទី៧ ក្រោមការដឹកនាំដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ឯកឧត្តម បានគូសបញ្ជាក់ទៀតថា រាជរដ្ឋាភិបាលអាណត្តិទី៧ ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញនូវកម្មវិធីគោលនយោបាយអាទិភាពចំនួន ៦ នៃយុទ្ធសាស្ត្របញ្ចកោណ ដំណាក់កាលទី១ ដែលគ្រប់កម្មវិធីទាំងអស់ បានផ្តោតសំខាន់លើធាតុសំខាន់ចំនួន ៤ រួមមាន មនុស្ស ទឹក ផ្លូវ និងភ្លើង ជាពិសេសក្នុងគោលបំណងតែមួយគត់ គឺការយកចិត្តទុកដាក់លើសុខមាលភាព និងការលើកកម្ពស់ជីវភាពរស់នៅរបស់ប្រជាជន។

ដើម្បីចូលរួមឆ្លើយតបនឹងតម្រូវការរបស់ប្រជាពលរដ្ឋ ក៏ដូចជាជំរុញដល់ការអភិវឌ្ឍនៅមូលដ្ឋាន ឯកឧត្តម បានជំរុញលើកទឹកចិត្តឱ្យក្រុមការងារទាំងអស់ រួមជាមួយរដ្ឋបាលស្រុកបាធាយគ្រប់ជាន់ថ្នាក់ បន្តរួមគ្នាខិតខំជំរុញការដោះស្រាយនូវការងារអាទិភាព ក្នុងគោលដៅបន្តលើកកម្ពស់ការផ្តល់សេវាសាធារណៈ និងការដោះស្រាយបញ្ហាប្រឈម សំណើ និងសំណូមពរនានាជូនប្រជាពលរដ្ឋ ជាពិសេសបន្តការកសាងភាពស្និទ្ធស្នាល និងភាពស្អាតស្អំ រវាងរាជរដ្ឋាភិបាលកម្ពុជា និងប្រជាពលរដ្ឋ ប្រកបដោយតម្លាភាព គណនេយ្យភាព និងប្រសិទ្ធភាព។