រដ្ឋមន្រ្តីសុខាភិបាល ជំរុញ និងបង្កើនការផលិត សារអប់រំសុខភាពបន្ថែមទៀត ដើម្បីផ្សព្វផ្សាយដល់សាធារណជន អំពីការថែទាំសុខភាព និងត្រូវចូលរួមអនុវត្តទាំងអស់គ្នា

រាជធានីភ្នំពេញ៖  ថ្លែងបន្តទៀតនោះឯកឧត្តមសាស្រ្តចារ្យឈាង រ៉ា រដ្ឋមន្ត្រីក្រសួងសុខាភិបាល ក៏បានណែនាំដល់ថ្នាក់ដឹកនាំមន្ទីរពេទ្យ ត្រូវបង្កើនការយកចិត្តទុកដាក់បញ្ហាសុខភាពបឋម និងត្រូវបង្កើនការអនុវត្តឱ្យកាន់តែមានប្រសិទ្ធភាពខ្ពស់ ត្រូវពង្រឹងការបម្រើសេវាសារវន្តនៅតាមមូលដ្ឋានសុខាភិបាលសាធារណៈ និងសេវាឯកជន។ មួយផ្នែកទៀត ឯកឧត្តមសាស្រ្តាចារ្យ បានសង្កត់ធ្ងន់ថា ថ្នាក់ដឹកនាំ និងមន្ទីរសុខាភិបាលរាជធានី ខេត្ត ត្រូវយកចិត្តទុកដាក់ រាប់តាំងពីឯកសណ្ឋាន សម្រាប់ផ្តល់ជូនមន្រ្តីក្រោមឱវាទ ដោយត្រូវរៀបចំឱ្យបានត្រឹមត្រូវ ទាន់ពេលវេលា និងគុណភាព ដោយវាស់កាត់ឱ្យបានស្អាតល្អ និងសមរម្យបំផុត។

ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំគ្រប់កម្រិត រហូតដល់មន្ទីរសុខាភិបាលរាជធានី ខេត្ត ត្រូវពង្រឹងការបម្រើសេវាសុខភាពជូនប្រជាជន គ្រប់ពេលវេលា ជាពិសេសក្នុងអំឡុងពេលមានពិធីបុណ្យនានា ប្រកបដោយគុណភាព ស្មារតីទទួលខុសត្រូវ ប្រសិទ្ធភាព និងសមធម៌។ ទន្ទឹមនឹងនេះដែរ ឯកឧត្តមសាស្រ្តាចារ្យ បានជំរុញដល់អង្គភាពជំនាញ ត្រូវបង្កើនការផលិត និងផ្សព្វផ្សាយសារអប់រំសុខភាពដល់ប្រជាពលរដ្ឋ ដើម្បីសម្រេចបាននូវគោលដៅយុទ្ធសាស្រ្តរបស់ក្រសួងសុខាភិបាល និងរាជរដ្ឋាភិបាលដែលបានដាក់ចេញ។

កាលដែលឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល មានប្រសាសន៍បែបនេះនៅក្នុងគ្រាដែលឯកឧត្តមដឹកនាំកិច្ចប្រជុំកម្រិតថ្នាក់ដឹកនាំលើកទី២ នៃខែមករា ដើម្បីពិនិត្យវឌ្ឍនភាពការងារ និងលើកទិសដៅការងារ ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល និងតាមប្រព័ន្ធ Zoom តំណាងមន្ទីរសុខាភិបាលនៃរដ្ឋបាលរាជធានី ខេត្ត នៅទីស្តីការក្រសួងសុខាភិបាល កាលពី

រសៀលថ្ងៃទី២៧ ខែមករា ឆ្នាំ២០២៥ ម្សិលមិញនោះ។

ក្នុងកិច្ចប្រជុំនោះដែរ ឯកឧត្តមសាស្រ្តាចារ្យរដ្ឋមន្រ្តី ក៏បានគូសរំលឹកដល់ថ្នាក់ដឹកនាំ និងមន្រ្តីទទួលបន្ទុក រៀបចំការងារសន្និបាតសុខាភិបាល លើកទី៤៤ ដែលនឹងប្រព្រឹត្តទៅនាថ្ងៃទី៣ និងទី៤ ខែមីនា ឆ្នាំ២០២៥ ខាងមុខនេះ ត្រូវរៀបចំឱ្យបានល្អ និងទាន់ពេលវេលា៕