តំណាងអគ្គស្នងការនគរបាលជាតិកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងក្នុងកិច្ចប្រតិបត្តិការបង្ការទប់ស្កាត់ និងបង្ក្រាបបទល្មើសគ្រឿងញៀននាពេលកន្លងមកយ៉ាងសកម្ម ទទួលបានលទ្ធផលល្អ
ឯកឧត្តម ឧត្តមសេនីយ៍ឯក ព្រុំ សន្ធរ ឯកឧត្តម ឧត្តមសេនីយ៍ឯក ប៊ុនប៉ា ម៉ារីលុច ក្នុងនាមឯកឧត្តម នាយឧត្តមសេនីយ៍ អគ្គស្នងការនគរបាលជាតិ បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងក្នុងកិច្ចប្រតិបត្តិការបង្ការទប់ស្កាត់ និងបង្ក្រាបបទល្មើសគ្រឿងញៀននាពេលកន្លងមកយ៉ាងសកម្ម ទទួលបានលទ្ធផលល្អ។ ទន្ទឹមនោះក៏នៅមានចំណុចខ្វះខាតមួយចំនួនដែលត្រូវកែលំអ និងជាបទពិសោធន៍ផងដែរ។ ឯកឧត្តម ឧត្តមសេនីយ៍ឯក ប៊ុនប៉ា ម៉ារីលុច និងឯកឧត្តម ឧត្តមសេនីយ៍ឯក ព្រុំ សន្ធរ អគ្គស្នងការរងនគរបាលជាតិ តំណាងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ មានប្រសាសន៍បែបនេះ ក្នុងឱកាសអញ្ជើញដឹកនាំកិច្ចប្រជុំផ្សព្វផ្សាយសេចក្តីសម្រេច ស្តីពីការប្រគល់ភារកិច្ចជូនថ្នាក់ដឹកនាំនៃមន្ទីរប្រឆាំងគ្រឿងញៀន នៅអគ្គស្នងការដ្ឋាននគរបាលជាតិ ដោយមានការចូលរួមពី ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន លោក-លោកស្រី នាយករងមន្ទីរ និងនាយការិយាល័យទាំង១១ នៃមន្ទីរប្រឆាំងគ្រឿងញៀននៅរសៀលថ្ងៃទី១០ ខែកញ្ញា ឆ្នាំ២០២៤។បន្ទាប់ពីលោកវរសេនីយ៍ឯក គង់ សីវឌ្ឍនា នាយការិយាល័យរដ្ឋបាល-សរុប អានសេចក្តីសម្រេច ផ្សព្វផ្សាយស្តីស្តីពីការប្រគល់ភារកិច្ចជូនថ្នាក់ដឹកនាំ នៃមន្ទីរប្រឆាំងគ្រឿងញៀនរួចមក,ឯកឧត្តមបានគូសបញ្ជាក់ថា ការប្រគល់ភារកិច្ចថ្មីជូនដល់ លោក-លោកស្រី នាយករងមន្ទីរនៅពេលនេះ សំដៅពង្រឹងពិសេសប្រសិទ្ធការងារ និងការទទួលខុសត្រូវលើការបញ្ជាដឹកនាំផងដែរ។ ឯកឧត្តម ឧត្តមសេនីយ៍ឯក ប៊ុនប៉ា ម៉ារីលុច ក៏បានផ្តាំផ្ញើដល់លោក-លោកស្រី នាយករងមន្ទីរ និងលោកនាយការិយាល័យជំនាញ និងមន្ត្រីទាំងអស់ សូមពង្រឹងរបៀបរបបការងារ ជាពិសេសត្រូវប្រកាន់ឱ្យបានភ្ជាប់ភ្ជួននូវបទវិន័យកងកម្លាំងនគរបាលជាតិកម្ពុជា៕
