ក្រុមកីឡាបាល់ទាត់ ពិធីករកីឡាកម្ពុជា ប្រកួតជាមួយក្រុមបាល់ទាត់គុនខ្មែរ ដើម្បីមនុស្សធម៌ ក្រោមប្រធានបទ “យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត” នាថ្ងៃទី១៨ កុម្ភៈ

ព្រឹត្តិការណ៍ការប្រកួតបាល់ទាត់មនុស្សធម៌ ក្រោមប្រធានបទ “យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត» ដើម្បីរួមចំណែកជួយដល់សង្គមជាតិរបស់យើង ស្របពេលដែលតម្រូវការឈាមមានការកើនឡើងច្រើនពី ១ថ្ងៃទៅ១ថ្ងៃ នឹងប្រារព្ធធ្វើនាថ្ងៃ១៨ ខែកុម្ភៈ ឆ្នាំ២០២៥ ខាងមុខនេះ ក្រោមអធិបតីភាពឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្ត្រីក្រសួងមុខងារសាធារណៈ នៅមជ្ឈមណ្ឌលកីឡាកងយោធពលខេមរភូមិន្ទ។

កាលពីថ្ងៃទី១២ ខែកុម្ភៈ ឆ្នាំ២០២៥ លោក គុជ ឆៃយ៉ា អ្នកចាត់ការទូទៅ ក្រុមបាល់ទាត់ពិធីករ កីឡាកម្ពុជា លោករឿង សោភ័ណ្ឌ តំណាង ឯកឧត្តម ខូវ ឆាយ ក្រុមបាល់ទាត់ គុនខ្មែរ និងជាប្រធានសព័ន្ធកីឡាប្រដាល់គុនខ្មែរ និងលោកវេជ្ជបណ្ឌិត សុខ ប៉ូ នាយកមជ្ឈមណ្ឌលជាតិ ផ្តល់ឈាម បានចូលរួម ក្នុងពិធី សន្និសីទសារព័ត៌មាន ស្តីពីព្រឹត្តិការណ៍ការប្រកួតបាល់ទាត់មនុស្សធម៌ ក្រោមប្រធានបទ “យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត» ។

លោក គុជ ឆៃយ៉ា អ្នកចាត់ការទូទៅ ក្រុមបាល់ទាត់ពិធីករ កីឡាកម្ពុជា បានបញ្ជាក់ថា នៅមុនការប្រកួត ចាប់ផ្តើមជាផ្លូវការនោះ ក្រុមកីឡាបាល់ទាត់ទាំង២ក្រុម នឹងនាំគ្នាធ្វើការ បរិច្ចាគឈាម នឹងចាប់ផ្តើមនៅវេលាម៉ោង ៧:៣០ នាទីព្រឹករហូតដល់ម៉ោង ៥:០០ នាទីល្ងាច ក្រៅពីកម្មវិធី បរិច្ចាគឈាម ក៏មាន ការប្រកួតបាល់ទាត់មិត្តភាព រវាងក្រុមកីឡាបាល់ទាត់ ពិធីករកីឡាកម្ពុជា ប្រកួតជាមួយ ក្រុមបាល់ទាត់គុនខ្មែរ នឹងចាប់ផ្តើមប្រកួត នូវម៉ោង ៦:០០ល្ងាច តទៅ ។

លោក អ្នកចាត់ការទូទៅ ក្រុមបាល់ទាត់ពិធីករ កីឡាកម្ពុជាបានបន្តថា ព្រឹត្តិការណ៍ប្រកួតបាល់ទាត់មនុស្សធម៌ រវាងក្រុមពិធីករកីឡាកម្ពុជា និងបាល់ទាត់គុនខ្មែរ ក្រោមប្រធានបទ “យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត” រវាងក្រុមបាល់ទាត់ពិធីករបាល់ទាត់ និងក្រុមបាល់ទាត់គុនខ្មែរធ្វើឡើង ដោយមានការចង្អុលបង្ហាញណែនាំ និងគាំទ្រដ៏ខ្ពស់ខ្ពស់ពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ៕