ការបរិច្ចាគឈាមរបស់បុគ្គលិក ធនាគារ ហត្ថា ក្នុងថ្ងៃនេះបានសបញ្ជាក់យ៉ាងច្បាស់អំពីការចូលរួមយ៉ាងសកម្មក្នុងសកម្មភាពទំនួលខុសត្រូវសង្គមជាមួយនឹងការយកចិត្តទុកដាក់ ការស្រលាញ់ និងចូលរួមដើម្បីជាប្រយោជន៍ដល់សហគមន៍ និងសង្គមជាតិ

លោក មិន សុផា ប្រធាននាយកប្រតិបត្តិ ធនាគារ ហត្ថា មានប្រសាសន៍បែបនេះនៅក្នុងឱកាស  ដែលធនាគារហត្ថា សហការជាមួយមជ្ឈមណ្ឌលជាតិផ្ដល់ឈាម រៀបចំកម្មវីធីបរិច្ចាគឈាមក្រោមប្រធានបទ ​“បរិច្ចាគឈាម សង្គ្រោះជីវិត” សម្រាប់ជួយដល់បងប្អូនប្រជាជនខ្មែរដែលកំពុងត្រូវការឈាមជាចាំបាច់ក្នុងការជួយសង្គ្រោះជីវិតអ្នកជំងឺដែលកំពុងសម្រាកព្យាបាលជំងឺនៅមន្ទីពេទ្យនៅទូទាំងប្រទេស កាលពីព្រឹកថ្ងៃទី​១៨​ ខែកក្ដដា ឆ្នាំ២០២៥។ កម្មវិធីនេះបានប្រព្រឹត្តិទៅនៅអគារធនាគារ ​ហត្ថា ដែលស្ថិតនៅតាមបណ្តោយមហាវិថីសម្តេចតេជោ ហ៊ុនសែន សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយមានការអញ្ជើញចូលរួមពីលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម ព្រមទាំងសហការី និងថ្នាក់គ្រប់គ្រង ហើយនិងបុគ្គលិកនៃធនាគារ ហត្ថា ប្រមាណជិត ២០០នាក់។

លោកប្រធាននាយកប្រតិបត្តិមានប្រសាសន៍បន្ថែមទៀតថា ការបរិច្ចាគឈាមរបស់បុគ្គលិក ធនាគារ ហត្ថា ក្នុងថ្ងៃនេះបានសបញ្ជាក់យ៉ាងច្បាស់អំពីការចូលរួមយ៉ាងសកម្មក្នុងសកម្មភាពទំនួលខុសត្រូវសង្គមជាមួយនឹងការយកចិត្តទុកដាក់ ការស្រលាញ់ និងចូលរួមដើម្បីជាប្រយោជន៍ដល់សហគមន៍ និងសង្គមជាតិ។ យើងទាំងអស់គ្នាពិតជាមានមោទនភាព និងសប្បាយចិត្តក្នុងការចូលរួមចំណែកជួយដល់សង្គមកម្ពុជា ក៏ដូចជាផ្ដល់នូវក្ដីស្រលាញ់ចំពោះសហគមន៍របស់យើង។

លោក មិន សុផា ប្រធាននាយកប្រតិបត្តិ ធនាគារ ហត្ថា បន្ថែមថា“ នេះមិនមែនជាលើកទី១ របស់ធនាគារ ហត្ថា ទេ ដែលរៀបចំកម្មវិធីបរិច្ចាគឈាមនេះឡើង ហើយកម្មវិធីនេះ ត្រូវបានរៀបចំឡើងដើម្បីចូលរួមចំណែកជាមួយរាជរដ្ឋាភិបាលក្នុងការលើកកម្ពស់សុខមាលភាពរបស់ប្រជាជនកម្ពុជា ព្រមទាំងជួយសង្គ្រោះអាយុជីវិតរបស់អ្នកជំងឺដែលត្រូវការឈាមជាចាំបាច់។ លោកបានបន្តថា “ ខ្ញុំសូមលើកទឹកចិត្តអោយបុគ្គលិកធនាគារ ហត្ថា ទាំងអស់បន្តធ្វើការបរិច្ចាគឈាមនេះ អោយបានទៀតទាត់ដើម្បីលើកកំពស់សុខភាពផ្ទាល់ខ្លួន និងសង្រ្គោះអាយុជីវិតជនរងគ្រោះ ”។

លោក ប្រធាននាយកប្រតិបត្តិ ធនាគារ ហត្ថា បានបញ្ជាក់ឲ្យដឹងទៀតថា   ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាលជាង ៣០ឆ្នាំមកហើយ ដែលបានផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន ដែលមានអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាអាជីវកម្មធំៗជាច្រើនទៀត។ ហត្ថា ជាធនាគារពាណិជ្ជឈានមុខគេមួយក្នុងប្រទេសកម្ពុជា ដែលមានតាមបណ្ដាញសាខាយ៉ាងទូលំទូលាយរហូតដល់ ១៥៦ សាខា គ្របដណ្តប់ទូទាំងប្រទេស។ ធនាគារ ហត្ថា បានទទួលការវាយតម្លៃជាស្ថាប័នមានស្ថិរភាពហិរញ្ញវត្ថុរឹងមាំ តាមរយៈការរក្សាបាននូវចំណាត់ថ្នាក់ BBB+ អស់រយៈពេល ០៧ឆ្នាំជាប់គ្នា ពីក្រុមហ៊ុន TRIS Rating ដែលចំណាត់ថ្នាក់នេះសបញ្ជាក់ឱ្យឃើញថា ធនាគារ ហត្ថា មានដំណើរការមុខជំនួញរបស់ខ្លួនប្រកបដោយស្ថិរភាព និងឈានមុខគេនៅក្នុងទីផ្សារហិរញ្ញវត្ថុកម្ពុជា។ ជាងនេះទៅទៀត ធនាគារ ហត្ថា មានមូលធនគ្រប់គ្រាន់ ស្ថិរភាពផ្នែកហិរញ្ញវត្ថុខ្ពស់ ព្រមទាំងមានសាច់ប្រាក់បង្វិលគ្រប់គ្រាន់ ដែលអាចធានាបាននូវការបន្តប្រតិបត្តិការអាជីវកម្មដោយរលូន។ ភាពរឹងមាំផ្នែកហិរញ្ញវត្ថុនេះ ទទួលបានការគាំទ្រយ៉ាងពេញទំហឹងពីធនាគារអាណាព្យាបាល គឺ MUFG ដែលជាសម្ព័ន្ធហិរញ្ញវត្ថុធំមួយ ដែលមានសាខាប្រហែល ​២000 ទីតាំង ស្ថិតនៅក្នុងទីផ្សារជាង ៤០ ក្នុងពិភពលោក។ សម្ព័ន្ធក្រុមហ៊ុនផ្តល់សេវាកម្មហិរញ្ញវត្ថុ MUFG បានការចុះបញ្ជីនៅលើផ្សារហ៊ុន (Tokyo Stock Exchange), ណាហ្គូយ៉ា (Nagoya Stock Exchange) និងញូយ៉ក (New York Stock Exchange) ដោយមានតម្លៃទីផ្សារ និងមានតម្លៃទីផ្សាររហូតដល់ ២៤.២៧ កោដិយាន់ និងប្រាក់ចំណេញសុទ្ធចំនួន ១.៥៩១,១ ពាន់លានយាន់ នៅត្រឹមចុងខែមីនា ឆ្នាំ ២០២៥៕