ឯកឧត្ដម ហ៊ីង ប៊ុនហៀង ទទួលអំណោយពីសប្បុរសជននៅខេត្ដព្រះវិហារ    

      គណៈប្រតិភូមួយក្រុមដឹកនាំដោយ ឯកឧត្ដម ឧកញ៉ា ឌឿន សុវណ្ណ ទីប្រឹក្សាក្រសួងមហាផ្ទៃ និងជាទីប្រឹក្សាផ្ទាល់ សម្ដេចពញាចក្រី ហេង សំរិន និងក្រុមគ្រួសារព្រមទាំងសប្បុរសជនអាជីវករ និងព្រះចៅអធិការដែលនិមន្ដមកពីវត្ដខ្សាច់ពូន ស្រុកឧដុង្គ ខេត្ដកំពង់ស្ពឺ បាននាំយកអំណោយជាសំភារៈ និងថវិកា ទៅចែកជូនដល់នាយទាហាន និងកងអន្ដរាគមពិសេស នៅ  ទីបញ្ជាការអង្គរក្សប្រចាំខេត្ដ ព្រះវិហារ កាលពីរសៀលថ្ងៃទី ៣ ខែកុម្ភៈ ឆ្នាំ ២០១០នេះ។

          នៅក្នុងឱកាសនោះ ឯកឧត្ដម ឧកញ៉ា ឌឿន សុវណ្ណ បានមានប្រសាសន៍ថា ការនាំយកអំណោយនាពេលនេះ គឺដើម្បីមកសួរសុខទុក្ខដល់នាយទាហានដែលប្រចាំការនៅទីបញ្ជាការអង្គរក្សខេត្ដព្រះវិហារ និង បានកោតសរសើរដល់កងកម្លាំង ប្រដាប់អាវុធគ្រប់ប្រភេទ ដែលមានមនសិការស្នេហាជាតិខ្ពស់ ក្នុងការពារទឹកដី ការពារមាតុភូមិ ការពារប្រាសាទព្រះវិហារ ដែលជានិមិត្ដរូបនៃដួងព្រឹងព្រលឹងជាតិខ្មែរ ហើយបានអនុវត្ដយ៉ាងខ្ជាប់ខ្ជូននូវអនុសាសន៍ និងបទបញ្ជារបស់ថ្នាក់ ដឹកនាំកំពូលៗ ដើម្បីប្រយោជន៍ជាតិ និងប្រជាជន។ ឯកឧត្ដមបានមានប្រសាសន៍ទៀតថា ការនាំយកអំណោយទាំងអស់ នៅលើទឹកដីប្រាសាទ ព្រះវិហារនេះ គឺជាការបង្ហាញពីទឹកចិត្ដគោរពស្រលាញ់ ចំពោះកងទ័ព ក៏ដូចជា ការផ្សារភ្ជាប់ រវាងសមរភូមិក្រោយ ជាមួយនឹងសមរភូមិមុខ និងបានបង្ហាញពីទឹកចិត្ដសាមគ្គីភាព ហើយបានលះបង់អ្វីៗទាំងអស់ ដើម្បីការ ពារបូរណភាពទឹកដីដ៏ពិសិដ្ឋរបស់យើង ក្រោមការដឹកនាំដ៏ឈ្លាសវៃរបស់ សម្ដេចអគ្គមហាសេនាបតីតេជោ ហ៊ុន សែន។